Oqtay Gülalıyevin səhhəti pisləşib
Avqustun 5-də hüquq müdafiəçisi Oqtay Gülalıyevin səhhəti pisləşib. “Turan”ın məlumatına görə, ona qida qəbulu üçün qoyulmuş boru səhər saatlarında sıradan çıxıb. Paytaxtdakı Mustafa Topçubaşov adına Elmi Cərrahiyyə Mərkəzinə aparılan hüquq müdafiəçisinə müvəqqəti qida borusu qoyulub, ancaq evdə qida qəbulu zamanı onda titrəmə, temperatur yüksəlişi başlayıb.
Oqtay Gülalıyevin müayinə üçün Mərkəzi Klinikaya aparıldığı, sonra Elmi Cərrahiyyə Mərkəzinə qaytarıldığı bildirilir.
Oqtay Gülalıyev 2019-cu il oktyabrın 29-u Bakıda piyada keçidi ilə yolu keçərkən taksi sürücüsü olduğu deyilən Kənan Abdullayevin idarə etdiyi minik avtomobili ilə vurulub, ağır kəllə-beyin travması alaraq koma vəziyyətinə düşüb. Hüquq müdafiəçisi həmin il noyabrın 6-dan Heydər Əliyev Fondunun dəstəyi ilə Türkiyədə müalicə olunub, 2020-ci il noyabrın 8-də Bakıya, evinə gətirilib.
Oqtay Gülalıyev müxalif mövqeyi ilə tanınıb. O, 2012-ci ilin aprel-iyun aylarında hakimiyyət nümayəndəsinin tələblərinə fəal şəkildə müqavimət göstərmə və kütləvi iğtişaşlara, vətəndaşlara qarşı zorakılığa çağırış ittihamı ilə həbsdə yatıb. Bu cinayət işi 2016-cı ilin oktyabrında xətm olunub.
Son illər Oqtay Gülalıyev dəfələrlə bəyan edib ki, hüquq müdafiəsi sahəsində fəaliyyətinə görə hədələnir, təqibə məruz qalır.
Kənan Abdullayevin cinayət işi Nəsimi Rayon Polis İdarəsində istintaq olunub. İstintaq zamanı sürücü barəsində başqa yerə getməmək haqqında iltizam qətimkan tədbiri seçilib. 2021-ci il yanvarın 25-də Nəsimi Rayon Məhkəməsi onu 2 il 3 ay müddətinə azadlıqdan məhrum edib. Yol hərəkəti qaydalarının pozulması – ehtiyatsızlıqdan zərər çəkmiş şəxsin sağlamlığına ağır zərər vurmaqda təqsirli bilinən Kənan Abdullayev məntəqə tipli müəssisədə cəza çəkir.
