Pediatrlar uşaqların maska taxmasını tövsiyə edirlər
ABŞ-ın Pediatriya Akademiyası 2 yaşdan yuxarı uşaqların məktəbəqədər təhsil müəssisələrində maska taxmasını tövsiyə edir.
Novator.az saytı ABŞ-ın “CBS News” kanalına istinadla xəbər verir ki, akademiyanın mütəxəssisləri peyvənd olunan uşaqların da təhsil müəssisələrinə gedərkən maskada olmasını məsləhət görürlər.
“CBS News” bildirir ki, pediatrların məsləhəti ABŞ-ın Xəstəliklərə Nəzarət və Profilaktika Mərkəzinin bu ayın əvvəlində açıqladığı tövsiyələrlə üst-üstə düşmür. Qurum peyvəndlənmiş tələbələrin maska taxmasına ehtiyac olmadığını bəyan etmişdi.
Məktəb Sağlamlığı Şurasının sədri doktor Sonya O’Liri pandemiyanın uşaqlara çox ziyan vurduğunu deyib: “Pandemiya uşaqların yalnız təhsilinə mənfi təsir göstərməyib, həm də onların psixioloji və fiziki sağlamlığına ziyan vurub. Ona görə də peyvəndlənmə, maska taxmaq və gigiyenik qaydaları gözləmək əyani təhsili hamı üçün təhlükəsiz və mümkün edəcək”.
Pediatrlar müəllimlərə və təhsil müəssisələrinin digər işçilərinə də vəziyyətdən asılı olmayaraq maska taxmağı tövsiyə edirlər. Onlar bildirirlər ki, ölkədə tələbələrin böyük hissəsi COVİD-19 infeksiyası əleyhinə vaksin vurdurmaq hüququna malik deyil. Yalnız 12 yaşdan yuxarı uşaqların ABŞ-da istifadə olunan üç peyvənddən birini vurdurmaq hüququ var.
Pediatriya Akademiyasının həkimi Sara Bode qeyd edib ki, bəzi insanların peyvəndlənməsi mümkün deyil: “Uşaqları koronavirusdan qorumaq üçün bütün metodlardan istifadə etmək lazımdır. Dünyada qəbul olunmuş maskalanma üsulu uşqaları digər respirator xəstəliklərdən müdafiə edən ən təsirli metodlardan biridir”.
Pediatrlar öz rəylərini bəyan edəndən sonra Ağ evin sözçüsü Cen Psaki mediaya açılamasında bildirib ki, prezident Cozef Bayden Pediatriya Akademiyasının tövsiyələrini nəzərə alacaq, ancaq müxtəlif fikirlər valideynləri karıxdıra da bilər: “Təhsil ocaqlarının verdiyi qərarlar digər qərarlardan fərqlənə bilər. Əlbəttə, biz bunu anlayırıq və qəbul edirik. Ancaq hər halda akademiyanın göstəriş və tövsiyələrini nəzərə almağı düşünürük”.
Mənbə: Cbsnews.com
