Nigar Həzinin əsl hədiyyəsi
Müxalif siyasətçi Tofiq Yaqublunun qızı, Müsavat Partiyasının üzvü Nigar Həzi özünün “Facebook” səhifəsində doğum günündən yazıb: “33 yaşım oldu. Bu illərə nələr sığmadı… 33 ilin 8 ili həbsxanalarla bağlı olub. Bu illər ərzində cəmi bir dəfə doğum gününü ailəliklə qeyd etmişik, onda da Nərgiz yox idi yanımızda.
Son illər çox ağır oldu, çox pis günlər gördük, amma yaxşı günlərimiz də var. Ata şərti də olsa azaddır, uzun illərdən sonra ilk dəfədir doğum günümdə həbsdə deyil. Qardaşım müharibədən sağ-salamat gəldi. Mənim üçün əsl hədiyyə sevdiyim insanların yanımda olmasıdır”.
Novator.az bildirir ki, 1961-ci il təvəllüdlü Tofiq Yaqublu milli azadlıq hərəkatının (1988-1991) fəalı, Birinci Qarabağ müharibəsinin veteranıdır. Əbülfəz Elçibəyin prezidentliyi dövründə (1992-1993) Binəqədi Rayon İcra Hakimiyyəti başçısının birinci müavini vəzifəsində çalışıb. Müsavat Partiyasının və Demokratik Qüvvələrin Milli Şurasının üzvüdür.
1998-ci ildə 2 il müddətinə şərti azadlıqdan məhrumetmə cəzasına məhkum edilib.
2013-cü il fevralın 4-dən 2016-cı il martın 17-dək həbsdə olub.
2020-ci il martın 22-də Tofiq Yaqublu yenidən tutulub, sentyabrın 3-də Bakının Nizami Rayon Məhkəməsinin hökmü ilə 4 il 3 aylıq azadlıqdan məhrumetmə cəzası alıb.
Tofiq Yaqublu Nizami Rayon Məhkəməsindəki proses bitməzdən bir gün əvvəl – sentyabrın 2-də Bakının Şüvəlan qəsəbəsindəki 3 saylı İstintaq Təcridxanasında bəraət və azadlıq tələbi ilə aclıq aksiyasına başlayıb, vəziyyəti ağırlaşdığı üçün sentyabrın 12-də paytaxtdakı “City Hospital” xəstəxanasına köçürülüb.
Sentyabrın 18-də Bakı Apellyasiya Məhkəməsi Tofiq Yaqublu haqqında həbs qətimkan tədbirini ev dustaqlığı ilə əvəzləyib. Siyasətçi həmin gün aclıq aksiyasını dayandırıb və evə buraxılıb.
2021-ci il iyulun 15-də Bakı Apellyasiya Məhkəməsi siyasətçiyə kəsilən 4 il 3 aylıq azadlıqdan məhrumetmə cəzasının yerdə qalan hissəsini şərti cəza ilə əvəzləyib.
Tofiq Yaqublunun qızı Nərgiz Yaqublu Müsavat fəalı olub. O, 2015-ci ilin aprel ayında, atası həbsdə olan vaxt vəfat edib.
Siyasətçinin oğlu Rəhim Yaqublu 2020-ci ilin yanvar ayından 2021-ci ilin iyul ayına kimi Azərbaycan Ordusunda xidmət edib, İkinci Qarabağ müharibəsində döyüşüb.
Nigar Həzi 2012-2013-cü illərdə həbsdə olub. O, jurnalist, AXCP sədrinin müavini Seymur Həzinin həyat yoldaşıdır. Onlar 2016-cı ilin avqustunda, Seymur həbsdə olarkən ailə qurublar. Seymur Həzi 2014-cü il avqustun 29-da tutulub, 5 il müddətinə azadlıqdan məhrum edilib, 2019-cu il avqustun 29-da həbs cəzasını başa vuraraq azadlığa buraxılıb.
