Qanun yenilikləri imzalandı
Prezident İlham Əliyev “Əlilliyi olan şəxslərin hüquqları haqqında” qanunda yeniliyi imzalayıb. Novator.az bildirir ki, dəyişikliyə görə, əlillik müddəti bitdikdən sonra 6 ay ərzində əlilliyin təkrar qiymətləndirilməsi nəticəsində şəxsin əlilliyi yenidən müəyyən edildikdə şəxs ötürülmüş müddət də daxil olmaqla əlilliyi olan şəxs sayılacaq.
“Əmək pensiyaları haqqında” qanuna da analoji dəyişiklik edilib.
Dövlət başçısının imzası ilə “Mediasiya haqqında” qanun da yenilənib. Dəyişikliyə əsasən, tərəf mediasiyaya dair qeyd-şərtə və ya mediasiya prosesinin tətbiqi barədə müqavilənin şərtlərinə zidd olaraq mediasiyada üzrsüz səbəbdən iştirak etməməyə, ilkin mediasiya sessiyasına üzrsüz səbəbdən qatılmamağa görə məsuliyyət daşımayacaq.
Məhkəmə mediasiyası maddəsində dəyişikliyə əsasən, prosesin istənilən mərhələsində məhkəmə işin hallarını nəzərə alaraq öz təşəbbüsü ilə, yaxud tərəflərdən birinin müraciəti əsasında onlara mübahisənin mediasiya vasitəsilə həllini təklif edə bilər. Tərəflər arasında mediasiya prosesinin tətbiqi barədə müqavilə bağlanarsa, məhkəmə icraatı barışıq sazişi və mediasiya prosesinin nəticələri barədə protokol təqdim edilənədək dayandırılır. Tərəflər arasında mübahisə mediasiya vasitəsilə həll edildikdə barışıq sazişi məhkəməyə təqdim olunur. Məhkəmə təqdim edilmiş barışıq sazişini təsdiq etdikdə həmin iş üzrə icraata xitam verilir.
Mediasiya mülki işlər və kommersiya mübahisələri (xarici elementli mübahisələr də daxil olmaqla); ailə münasibətlərindən irəli gələn mübahisələr; əmək münasibətlərindən irəli gələn mübahisələr; inzibati hüquq münasibətlərindən irəli gələn mübahisələr üzrə tətbiq edilir.
Kommersiya mübahisələri, həmçinin ailə və əmək münasibətlərindən irəli gələn mübahisələr üzrə məhkəməyə müraciət etməmişdən əvvəl ilkin mediasiya sessiyasında iştirak tələb olunur.
“Mediasiya haqqında” qanun 2020-ci il iyulun 1-dən tətbiq olunmalı idi. Sonra həmin müddət 2021-ci il yanvarın 1-nə, daha sonra 2021-ci il iyulun 1-nə keçirilib.
