İyulun 19-u Mərkəzi Komanda Məntəqəsində müdafiə naziri Zakir Həsənovun rəhbərliyi ilə xidməti müşavirə keçirilib. Nazir müavinləri, qoşun növləri komandanları, nazirliyin baş idarə, idarə və xidmət rəislərinin qatıldığı müşavirəyə azad edilmiş ərazilərdə dislokasiya olunan hərbi birlik və birləşmə komandirləri, o cümlədən digər məsul zabitlər video vasitəsilə cəlb olunub.

Mod.gov.az-ın məlumatına görə, prezident, ali baş komandan İlham Əliyevin “Artıq müharibə dövrü arxada qalıb, amma buna baxmayaraq biz müharibəyə hər an hazırıq və hazır olmalıyıq” sözlərini xatırladan müdafiə naziri şəxsi heyətin mənəvi-psixoloji və döyüş hazırlığı səviyyəsinin yüksəldilməsinin vacibliyini qeyd edib. Nazir döyüş növbətçiliyinə cəlb edilən hərbi qulluqçuların sayıqlığının artırılması, həmçinin bölmələrin maddi-texniki təminat imkanlarının daha da genişləndirilməsini tapşırıb.

Azad edilmiş ərazilərdə və Ermənistan-Azərbaycan dövlət sərhədindəki son vəziyyəti təhlil edən müdafiə naziri gərginliyin artırılmasında məsuliyyətin Ermənistanın üzərinə düşdüyünü bildirib, ehtimal olunan təxribatların qarşısının alınması ilə əlaqədar göstərişlər verib.

Ermənistan 1988-1994-cü illərin təcavüzündə Azərbaycanın bütün-cənub qərbini işğal edib.

2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-da əldə edilən atəşkəs razılaşması nəticəsində Cəbrayıl, Füzuli, Zəngilan, Qubadlı, Ağdam, Kəlbəcər rayonları tam, Şuşa, Laçın, Xocavənd, Xocalı rayonları və keçmiş Ağdərə rayonu qismən azad olunub.

Yuxarı Qarabağ bölgəsinin bir hissəsi işğalda qalır, Laçın şəhəri və rayonun 6 kəndi bölgədə atəşkəsə məsul Rusiya hərbçilərinin əlindədir.