İyulun 18-də OPEK ölkələri (Anqola, Birləşmiş Ərəb Əmirlikləri, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və qeyri-OPEK ölkələrinin (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) neft hasilatı ilə bağlı yeni razılaşması açıqlanıb. Razılaşmaya görə, gündəlik xam neft hasilatı 2021-ci ilin avqust-dekabr aylarında hər ay ümumilikdə 400 min barrel artırılır.

Azərbaycanın 2021-ci il büdcəsində bir barrel neftin qiyməti 40 dollardan götürülüb. “AzəriLayt” markalı Azərbaycan nefti yanvara 50,92, fevrala 56,68, marta 65,66, aprelə 64,25, maya 66,55, iyuna 70,57, iyula 75,95 dollarla başlayıb.

Gündəlik hasilat yanvar və fevralda 593 min barrel, martda 592,1 min barrel, apreldə 594 min barrel, mayda 586 min barrel, iyunda 610 min barrel olub. Beynəlxalq razılaşmaya əsasən, Azərbaycan gündəlik hasilatı iyulda 620 min barrel həcmində saxlamalıdır.

Dövlət Statistika Komitəsinin hesabatına görə, 2021-ci ilin yanvar-iyun aylarında Azərbaycanda 17,1 milyon ton neft çıxarılıb.

2008-ci ildə hasilat 44,5 milyon ton olub, 2009-cu ildə 50,4 milyon tona, 2010-cu ildə 50,8 milyon tona yüksəlib.

2011-ci ildə 45,6 milyon ton, 2012-ci ildə 43,4 milyon ton, 2013-cü ildə 43,5 milyon ton neft hasil edilib.

2014-cü ildə hasilat 42 milyon tona, 2015-ci ildə 41,6 milyon tona, 2016-cı ildə 41 milyon tona, 2017-ci ildə 38,7 milyon tona düşüb.

2018-ci ildə hasilat 38,8 milyon ton, 2019-cu ildə 37,4 milyon ton, 2020-ci ildə 34,5 milyon ton göstərilib.