Konstitusiya Məhkəməsi qərar verdi: 234+237
Konstitusiya Məhkəməsinin Plenumu Cinayət Məcəlləsinin 234-cü maddəsini 237-ci maddəsi ilə əlaqəli şəkildə şərh edib.
Novator.az bildirir ki, 234-cü maddə qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satmaya; 237-ci maddəsi qanunsuz olaraq tərkibində narkotik maddələr olan bitkiləri kultivasiya etməyə görə məsuliyyəti rəsmiləşdirir.
Konstitusiya Məhkəməsinin Şəki Apellyasiya Məhkəməsinin müraciəti əsasında çıxardığı qərarda qeyd edilir ki, qanunsuz olaraq xeyli və ya külli miqdarda əkilmiş, yetişdirilmiş, tərkibində narkotik maddələr olan bitkilərin (onların hissələrinin) toplanması Cinayət Məcəlləsinin 237-ci maddəsi ilə tövsif olunub: “Toplanan narkotik tərkibli bitkilərdən və ya onların hissələrindən satış məqsədi olmadan şəxsi istehlak miqdarından artıq miqdarda və yaxud satış məqsədi ilə istənilən miqdarda narkotik vasitənin hazırlanması və bundan sonra onun saxlanması, daşınması, göndərilməsi, emal edilməsi, yaxud satılması kimi cinayət əməlləri Cinayət Məcəlləsinin 234-cü və 237-ci maddələri ilə tövsif edilməlidir”.
Qərar Cinayət Məcəlləsinin 17.1-ci maddəsinin tələblərinə əsaslanır. Həmin maddəyə görə, müxtəlif maddələrlə nəzərdə tutulmuş iki və ya daha çox cinayətin törədilməsi, həmin cinayətləri törətmiş şəxs onlardan heç birinə görə məhkum olunmayıbsa və ya qanunla müəyyən edilmiş əsaslar üzrə cinayət məsuliyyətindən azad edilməyibsə, habelə bu cinayətlərdən heç birinə görə cinayət məsuliyyətinə cəlbetmə müddəti keçməyibsə, cinayətlərin məcmusunu yaradır.
