Şəhid ailəsinin üzvlərinə yeni güzəşt
Nazirlər Kabineti sosial müəssisələrin standartlarını və işsiz şəxslərin özünüməşğulluğunun təşkili qaydasını yeniləyib. İyulun 12-də verilən qərar şəhid ailəsinin üzvlərinə güzəşti rəsmiləşdirir.
Novator.az bildirir ki, sosial müəssisələrin standartlarına görə, Əmək və Əhalinin Sosial Müdafiəsi Nazirliyi, həmçinin hüquqi və ya fiziki şəxs yaratdığı sosial müəssisələrdə işçilərin orta illik sayının azı 80 faizini Dövlət Məşğulluq Agentliyinin müvafiq yerli qurumları və ya “DOST” mərkəzlərinin göndərişi ilə işə qəbul olunmuş sosial müdafiəyə xüsusi ehtiyacı olan və işə düzəlməkdə çətinlik çəkən şəxslər – əlilliyi olan şəxslər, şəhid ailəsinin üzvləri, 20 yaşadək gənclər, yetkinlik yaşına çatmamış uşaqları tərbiyə edən tək və çoxuşaqlı valideynlər, sağlamlıq imkanları məhdud 18 yaşınadək uşaqları tərbiyə edən valideynlər, pensiya yaşına iki ildən az qalmış şəxslər, cəzaçəkmə yerlərindən azad edilmiş şəxslər, məcburi köçkünlər təşkil etməlidir.
İşsiz şəxslərin özünüməşğulluğunun təşkili qaydasına görə, özünüməşğulluğun təşkili zamanı ünvanlı dövlət sosial yardımı alan şəxslərə, əlilliyi olan şəxslərə, şəhid ailəsinin üzvlərinə, bir ildən artıq işsiz kimi qeydiyyatda olanlara, pensiya yaşına iki ildən az qalmış şəxslərə, cəzaçəkmə yerlərindən azad edilmiş işsiz şəxslərə üstünlük verilməlidir.
Sənədlərin əvvəlki variantları şəhid ailəsinin üzvlərinə şamil olunmurdu.
