Nazirlik yarım ilə yekun vurdu
İyulun 9-u Daxili İşlər Nazirliyində 2021-ci ilin birinci yarısında fəaliyyətin nəticələri müzakirə olunub. Rəsmi məlumata görə, video formatlı kollegiya iclasında hesabat məruzəsi ilə çıxış edən nazirin birinci müavini, polis general-leytenantı Seyfulla Əzimov 2021-ci ilin yanvar-iyun aylarında qeydə alınmış cinayətlərin 84,3 faizinin böyük ictimai təhlükə törətməyən və az ağır növlər olduğunu, ötən ilin ilk yarısı ilə müqayisədə qəsdən adam öldürmələrin 1,3, adam öldürməyə cəhdlərin 11, oğurluqların 31, soyğunçuluqların 34, quldurluqların 8, avtomobil nəqliyyatı vasitələrinin qaçırılmasının 9,6, xuliqanlıqların 6,4, odlu silahın tətbiqi ilə baş verən cinayətlərin 32, yol-nəqliyyat hadisələrinin 0,5, qəzalarda ölənlərin sayının 11, xəsarət alanların sayının 0,5 faiz azaldığını deyib.
Hesabata əsasən, keçmiş illərdən bağlı qalmış 207 cinayət açılıb, axtarışda olan 2200, o cümlədən ağır və xüsusilə ağır cinayətlərdə təqsirləndirilən 248 şəxs tutulub.
Yarım ildə 435 kriminal qrupun zərərsizləşdirildiyi, qanunsuz olaraq odlu silah saxlayan və daşıyan 110 nəfərin cinayət məsuliyyətinə cəlb edildiyi, qeyri-leqal dövriyyədən 1 ton 843 kiloqram narkotik vasitə çıxarıldığı, qanunsuz kultivasiya olunan 140 ton narkotik xassəli bitkinin aşkarlanıb məhv edildiyi vurğulanıb.
