İnzibati ərazi bölgüsü: günümüz və tarix
Novator.az Azərbaycanın inzibati ərazi bölgüsünə nəzər salıb.
Dövlət Statistika Komitəsinin rəsmi hesabatına görə, ölkədə 63 rayon, 14 şəhər rayonu, 78 şəhər, 261 qəsəbə, 4248 kənd var.
67 şəhər inzibati dairəsi, 189 qəsəbə inzibati dairəsi, 1726 kənd inzibati dairəsi, 40 sahə inzibati dairəsi yaradılıb.
Ərazi 1606 bələdiyyəyə bölünüb.
2021-ci il iyulun 7-dək 11 iqtisadi rayon olub. Prezident İlham Əliyevin həmin gün imzaladığı fərmanla iqtisadi rayonların sayı 14-ə yüksəlib: Bakı, Naxçıvan, Abşeron-Xızı, Dağlıq Şirvan, Gəncə-Daşkəsən, Qarabağ, Qazax-Tovuz, Quba-Xaçmaz, Lənkəran-Astara, Mərkəzi Aran, Mil-Muğan, Şəki-Zaqatala, Şərqi Zəngəzur, Şirvan-Salyan.
1918-ci ildə Azərbaycan Xalq Cümhuriyyəti Bakı, Gəncə və Zaqatala dairəsinə bölünüb. Bakı quberniyasına Bakı, Göyçay, Cavad, Quba, Lənkəran, Şamaxı qəzaları, Gəncə quberniyasına Ərəş, Gəncə, Qazax, Şəki qəzaları daxil edilib. Zaqatala dairəsində Car, Balakən, Əliabad, Muxax, Almalı, Qax sahələri birləşib.
1920-ci ildə Azərbaycanda sovet hakimiyyəti qurulduqdan sonra Bakı və Gəncə quberniyaları ləğv edilib, Zaqatala dairəsi Zaqatala qəzasına çevrilib. Ərəş və Cavad qəzaları Ağdaş və Salyan adlandırılıb.
1921-ci ildə Azərbaycan SSR-də 17 qəza (Ağdaş, Bakı, Göyçay, Gəncə, Cəbrayıl-Qaryagin, Tovuz, Qazax, Zaqatala, Quba, Lənkəran, Şəki (Nuxa), Salyan, Şuşa, Şamaxı, Şamxor, Qubadlı, Zəngəzur) olub.
1929-cu ildə respublika ərazisində dairələr (Bakı, Quba, Lənkəran, Şirvan, Gəncə, Qarabağ, Zaqatala-Nuxa, Muğan) təşkil edilib.
Azərbaycan Mərkəzi İcraiyyə Komitəsinin və Xalq Komissarları Sovetinin 30 avqust 1930-cu il qərarı ilə respublika ərazisi 63 rayona bölünüb.
