Pensiya yenilikləri son oxunuşdan keçdi
Milli Məclisin 2 iyul iclasında “Əlilliyi olan şəxslərin hüquqları haqqında” qanunda dəyişiklik son oxunuşdan keçib. Novator.az bildirir ki, yeniliyə görə, əlillik müddəti bitdikdən sonra 6 ay ərzində əlilliyin təkrar qiymətləndirilməsi nəticəsində şəxsin əlilliyi yenidən müəyyən edildikdə şəxs ötürülmüş müddət də daxil olmaqla əlilliyi olan şəxs sayılacaq.
“Əmək pensiyaları haqqında” qanuna da analoji dəyişiklik son oxunuşda qəbul edilib.
Parlamentin 2 iyul iclasında həmçinin dövlət qulluqçusuna qulluq stajına görə əmək pensiyasına əlavələr təyin edilməsi qaydası son oxunuşda yenilənib.
“Dövlət qulluğu haqqında” qanuna əsasən, dövlət qulluqçusuna qulluq stajına görə əmək pensiyasına əlavələr təyin edilməsi üçün dövlət qulluğu vəzifəsində minimum 15 il qulluq stajı tələb olunur. Dəyişikliyə əsasən, dövlət orqanının əsasında publik hüquqi şəxsin yaradılması ilə əlaqədar dövlət qulluqçularının dövlət qulluğuna xitam verildiyi tarixə əmək pensiyası yaşına çatmasına ən çoxu 2 il qalmış dövlət qulluqçusu kimi əmək pensiyasına əlavə almaq hüququ onların dövlət qulluğu vəzifəsində minimum 13 il qulluq stajı olduğu halda yaranır.
Yenilik “Əmək pensiyaları haqqında” qanunda da əksini tapır.
