İyunun 30-da Müdafiə Nazirliyi 2020-ci ilin Vətən müharibəsində şəhid olmuş 2906 nəfər hərbi qulluqçunun və itkin düşmüş sayılan 8 nəfərin siyahısını yayıb.

Məlumata görə, itkin düşmüş hesab olunan kapitan Pənahov Əkbər Bəylər oğlu, leytenant Vəlizadə İbrahim Səməd oğlunun, gizir İxtiyar İlqarın, əsgərlər Feyzullayev Aydın Zakir oğlu, Mehdiyev Asim Yaqub oğlu, Qədirli Elnur Rəcəb oğlu, Salamov Qorxmaz Bayram oğlu, Səfərli Xəqani İlqar oğlunun tapılması işi davam etdirilir.

Ermənistan 1988-1994-cü illərin təcavüzündə Azərbaycanın bütün cənub-qərbini işğal edib.

2020-ci il sentyabrın 27-dən Azərbaycan Silahlı Qüvvələrinin apardığı əməliyyatlarda və noyabrın 10-da əldə olunan atəşkəs razılaşması nəticəsində ərazilərin böyük qismi azad olunub. Yuxarı Qarabağ bölgəsinin bir hissəsi işğalda qalır.

Laçın şəhəri və rayonun 6 kəndi bölgədə atəşkəsi qorumağa məsul olan Rusiya Ordusu bölmələrinin nəzarətindədir.