Vahid əlaqələndirmə mərkəzləri yaradılır
İyunun 25-də prezident İlham Əliyev “Şəhid ailələri üzvlərinin, müharibə ilə əlaqədar xəsarət almış hərbi qulluqçuların və əlilliyi müəyyən edilmiş şəxslərin müraciətləri üzrə vahid əlaqələndirmə mərkəzləri” yaradılmasına fərman verib. Sənəd mərkəzlərdə göstərilən xidmətlərin və həmin xidmətləri göstərən dövlət orqanlarının (qurumlarının) siyahısını və xidmət göstərilməsi qaydasını rəsmiləşdirir.
Əmək və Əhalinin Sosial Müdafiəsi Nazirliyi dövlət orqanlarının xidmətlər üzrə fəaliyyətinin əlaqələndirilməsi və müraciətlərin icra vəziyyətinin monitorinqi üzrə əlaqələndirici orqan qismində müəyyən olunub.
Fərmana görə, xidmətlər “bir pəncərə” prinsipi əsasında göstərilir; birbaşa (yerində), “Çağrı mərkəzi” vasitəsilə və səyyar formada təşkil edilir.
Fəaliyyət ilkin mərhələdə Dayanıqlı və Operativ Sosial Təminat Agentliyinin “DOST” mərkəzlərində, daha sonra digər inzibati ərazi vahidləri üzrə Əmək və Əhalinin Sosial Müdafiəsi Nazirliyinin yerli qurumlarının inzibati binalarında təşkil edilməlidir.
