Konstitusiya Məhkəməsindən yeni şərh
Konstitusiya Məhkəməsinin Plenumu Qaradağ Rayon Məhkəməsinin müraciəti əsasında Mülki Prosessual Məcəllənin 35.1-ci, 35.3-cü və 39.1-ci maddələrini əlaqəli şəkildə şərh edib.
Novator.az-ın məlumatına görə, Mülki Prosessual Məcəllənin 35.1-ci maddəsində qeyd olunur ki, qanunla başqa hal nəzərdə tutulmayıbsa, iddia cavabdehin rəsmi qeydə alındığı yerin məhkəməsinə verilir.
35.3-cü maddəyə əsasən, qarşılıqlı iddiaya aidiyyәtindәn asılı olmayaraq ilkin iddianın baxıldığı yerin məhkəməsində baxılır.
39.1-ci maddədə bildirilir ki, tikintiyə, qurğuya, torpaq sahəsinə mülkiyyət hüququnun tanınması, tikintinin, qurğunun, torpaq sahəsinin başqasının qeyri-qanuni sahibliyindən götürülməsi, mülkiyyət hüququndan məhrum etmə ilə əlaqədar olmayan sahibkarın və yaxud başqa qanuni sahibin hüquqlarının pozulmasını aradan qaldırmaq haqqında iddialar tikintinin, qurğunun, torpaq sahəsinin olduğu yerə görə verilir.
Konstitusiya Məhkəməsinin Plenumunun qərarına əsasən, ər-arvadın daşınmaz əşya üzərində ümumi birgə mülkiyyətinin bölünməsinə dair iddiaların ərazi aidiyyəti Mülki Prosessual Məcəllənin 35.1-ci maddəsinə uyğun olaraq qanunla başqa hal nəzərdə tutulmayıbsa, cavabdehin rəsmi qeydə alındığı yer üzrə müəyyən edilməlidir.
Daşınmaz əşya üzərində mülkiyyət hüququnun tanınmasına dair iddialar, müstəsna aidiyyət qaydalarını tənzimləyən Mülki Prosessual Məcəllənin 39.1-ci maddəsinə əsasən, həmin daşınmaz əşyanın olduğu yer üzrə məhkəməyə verilməlidir.
Ana qanuna görə, məhkəmələrin Konstitusiya Məhkəməsinə Azərbaycan Konstitusiyasının və qanunlarının şərh edilməsi haqqında müraciət hüququ var. Konstitusiya Məhkəməsinin qərarı Azərbaycan Respublikası ərazisində məcburi qüvvəyə malikdir.
