Əlilliyin yeni meyarları parlamentdən keçdi
Milli Məclisin 22 iyun iclasında əlilliyin müəyyən olunması meyarları üzrə qanun layihələri üçüncü – son oxunuşdan keçib. Novator.az bildirir ki, 2022-ci il iyulun 1-dən tətbiqi nəzərdə tutulan yeni meyarlarla əlillik orqanizmin funksiyalarının itirilməsi faizinin müəyyən edilməsi prinsipi əsasında və xəstəliyin ağırlıq dərəcəsi nəzərə alınmaqla təyin olunur. I dərəcə orqanizmin funksiyalarının 81-100 faiz itirilməsi, II dərəcə orqanizmin funksiyalarının 61-80 faiz itirilməsi, III dərəcə orqanizmin funksiyalarının 31-60 faiz itirilməsi kimi müəyyən edilir. Sağlamlıq imkanlarının məhdudluğu da bu əsasda təyin olunur.
Əlilliyin qiymətləndirilməsi şəxsin özünə qulluq, sərbəst hərəkət etmə, istiqamət seçmə, ünsiyyət, davranışına nəzarət etmə, öyrənmə və əmək fəaliyyəti üzrə məhdudlaşma dərəcəsi əsas götürülməklə aparılacaq.
Başqa bir yeniliyə görə, sağlamlıq imkanları məhdud 18 yaşınadək uşaqlar əlilliyi olan şəxs sayılmır, qanunvericiliyə “18 yaşınadək əlilliyi müəyyən edilmiş şəxslər” anlayışı əlavə olunur.
