Təhsilin yarı yolu
Təhsil Nazirliyi 2020-2021-ci tədris ilində Azərbaycanın ümumi təhsil məktəblərinin 11-ci siniflərini 84 min 69 nəfərin bitirəcəyini açıqlayıb. Novator.az-ın məlumatına görə, vətəndaş cəmiyyəti eksperti Samir Əliyev yazır ki, 2021-ci ilin məzunları orta məktəbə 2010-cu ildə qədəm qoymuş şəxslərdir: “Rəsmi bilgilərə əsasən, 2010-cu ildə 1-ci siniflərə 119 min 851 şagird gedib. Həmin şagirdlərin 35 min 782 nəfəri tam orta təhsil almır. Onların yalnız bir hissəsi 9-cu sinfi bitirdikdən sonra orta ixtisas və peşə təhsilinə üz tutub. Oğlan şagirdlərin 18 min 873 nəfəri tam orta təhsil görmür. Qızlarda bu göstərici 16 min 909 nəfərdir.
Təhsil Nazirliyinin başqa açıqlamasına görə, bu il 9-cu sinifləri 131 min 227 nəfər bitirəcək. Həmin şagirdlər 1-ci siniflərə 2012-2013-cü ilə gediblər, o vaxt sayları 135 min 425 nəfər olub. 4 min 198 nəfər 9-cu sinfi bitirə bilmir. 2261-i oğlanın, 1937 qızın təhsili yarıda qalır”.
