“Dini etiqad azadlığı haqqında” qanun yeniləndi
Prezident İlham Əliyev “Dini etiqad azadlığı haqqında” qanuna dəyişiklikləri imzalayıb.
Novator.az bildirir ki, əsas yeniliklərdən birinə görə, Azərbaycanda fəaliyyət göstərən dini mərkəzin (idarənin) dəvət etdiyi və ya Azərbaycanda rəsmi səfərdə olan əcnəbinin və ya vətəndaşlığı olmayan din xadiminin dini ibadət, ayin və mərasimlər aparmasına yol verilir.
Başqa bir dəyişikliyə görə, kütləvi dini ibadət, ayin və mərasimlərin icrası zamanı dini təlimin əsaslarının işıqlandırılmasını yalnız qanuni əsaslarla təyin olunmuş din xadimləri həyata keçirə bilər.
Digər yeniliyə əsasən, kütləvi dini ibadət, ayin və mərasimlər (dəfn, yas, iftar, kəbinkəsmə, mövlud və ehsan mərasimləri istisna olmaqla) dini ibadət yerlərində və ziyarətgahlarda keçirilir. Dini ibadət yerlərindən və ziyarətgahlardan kənarda kütləvi dini ibadət, ayin və mərasimlərə rəsmi razılıq gərəkdir.
Xarici ölkələrdə yerləşən və müvafiq din üçün müqəddəs hesab edilən yerlərə ibadət məqsədilə dindarların mütəşəkkil ziyarətlərini müvafiq dini mərkəzlər (idarələr) həyata keçirir.
Başqa bir yeniliyə görə, dini icmanı azı 50 nəfər yetkinlik yaşına çatmış Azərbaycan vətəndaşı yarada bilər.
Azərbaycan ərazisində qeyri-islam dini icmalarının dini mərkəzi (idarəsi) dövlət qeydiyyatına alınmış və azı 5 şəhər və rayonda (şəhər rayonu istisna olmaqla) fəaliyyət göstərən eyni dini etiqadlı 5 dini icmanın yığıncağında (qurultay, konfrans və s.) yaradıla bilər.
