Operatorların və provayderlərin uçotu: qayda yenilənib
Nazirlər Kabineti internet telekommunikasiya xidməti göstərən operatorların və provayderlərin uçotunun aparılması qaydasını yeniləyib.
İnternet telekommunikasiya xidməti göstərən provayder dedikdə internet provayder və host provayder nəzərdə tutulur.
Uçotu operatorların və provayderlərin və ya onların səlahiyyətli nümayəndələrinin müraciəti əsasında Nəqliyyat, Rabitə və Yüksək Texnologiyalar Nazirliyi aparır. Proses ödənişsiz həyata keçirilir.
Novator.az bildirir ki, operatorlar və provayderlər xidmət göstərməyə başladıqları vaxtdan 15 gün müddətində uçota durmalıdırlar. Bunun üçün “Elektron hökumət” portalına daxil olaraq müvafiq ərizəni elektron qaydada doldurmaq, elektron imza sertifikatlarından istifadə etməklə imzalamaq gərəkdir.
Ərizəyə bu sənədlər əlavə olunur:
– operator (provayder) hüquqi şəxs olduğu halda onun nizamnaməsinin surəti;
– xidmət göstərməyə başladığı ilk abunəçi (abunəçilər) ilə bağlanmış müqavilənin (müqavilələrin) surəti (surətləri) (qayda qüvvəyə mindiyi tarixədək internet telekommunikasiya xidməti göstərməyə başlamış operatorlar və provayderlər üçün xidmət müqaviləsinin (müqavilələrin) surəti (surətləri);
– ərizəni ərizəçinin nümayəndəsi doldurduğu təqdirdə müvafiq səlahiyyətini təsdiq edən sənədin surəti.
Nəqliyyat, Rabitə və Yüksək Texnologiyalar Nazirliyi uçota alınması üçün təqdim olunan sənədlərə onların qeydiyyat tarixindən etibarən 7 iş günü müddətində baxır.
Uçota alınmış operatorlar və provayderlər barədə bu məlumatlar nazirliyin internet informasiya ehtiyatında yerləşdirilməlidir:
– uçota alınan operatorun və ya provayderin adı;
– göstərdiyi internet telekommunikasiya xidmətinin növü;
– uçota alınma tarixi və uçot nömrəsi;
– uçot ləğv olunduqda uçotun ləğv olunma tarixi və səbəbi.
Qayda Nazirlər Kabinetinin 12 oktyabr 2017-ci il qərarı ilə təsdiqlənib, yenilənmə 9 iyun 2021-ci ildə aparılıb.
