Dövlət Statistika Komitəsi istehlak bazarında qiymətlərin necə dəyişdiyini açıqlayıb. Novator.az bildirir ki, rəsmi hesabata görə, 2021-ci ilin yanvar-may aylarında istehlak qiymətləri 2020-ci ilin eyni dövrünə nisbətən 4,2 faiz artıb, ərzaq məhsulları, içkilər və tütün məmulatları 4,8 faiz, qeyri-ərzaq məhsulları 3,8 faiz, əhaliyə göstərilən ödənişli xidmətlər 3,4 faiz bahalaşıb.

Başqa bir rəsmi məlumata əsasən, yanvar-may aylarında pərakəndə ticarət şəbəkəsində 8 milyard 381,2 milyon manatlıq ərzaq məhsulları, içkilər və tütün məmulatları, 6 milyard 859,4 milyon manatlıq qeyri-ərzaq malları satılıb, 2020-ci ilin ilk beş ayı ilə müqayisədə pərakəndə ticarət dövriyyəsi real ifadədə 0,3 faiz, o cümlədən ərzaq məhsulları, içkilər və tütün məmulatları üzrə 2,2 faiz yüksəlib, qeyri-ərzaq malları üzrə 1,9 faiz düşüb.

Hesabat dövründə istehlak məqsədilə alınan mallara xərclənən vəsaitin 49,5 faizi ərzaq məhsullarına, 5,5 faizi içkilər və tütün məmulatlarına sərf olunub.