Beynəlxalq Energetika Agentliyi enerji transformasiyası ilə bağlı yeni hesabat yayıb. Novator.az-ın məlumatına görə, hesabata nəzər salan iqtisadçı Rövşən Ağayev yazır ki, agentlik 2030-cu ilədək dünya iqtisadiyyatının 40% böyüyəcəyini, enerji istehlakının 7% azalacağını proqnozlaşdırır: “Bu, enerjiyə qənaət texnologiyalarının tətbiqi sayəsində mümkün olacaq, “yaşıl energetika” yaxın 10 ildə 14 milyon yeni iş yeri yaradacaq.

Beynəlxalq Energetika Agentliyi hesab edir ki, resurs ölkələrinin yeni neft yataqlarının işlənməsi üçün lisenziyalar verməsinə ehtiyac aradan qalxır, bu prosesi dayandırmaq lazımdır. Çünki neftə olan tələbat hər il azalacaq, 2030-cu ilədək bir barrel neftin qiyməti 35 dollar ətrafında qərarlaşacaq. Peşəkar və dürüst siyasi idarəetmə, yüksək bilik və texnologiyaya əsaslanan iqtisadiyyat qura bilməyən resurs ölkələri yeni texnoloji əsrin “feodal periferiyaları” kimi yaşamağa məhkum qalacaqlar”.

Energetika Nazirliyinin 9 iyun məlumatına görə, “AzəriLayt” markalı Azərbaycan neftinin barreli 72,65 dollara satılır.

2021-ci ilin dövlət büdcəsində bir barrel neftin qiyməti 40 dollardan götürülüb. “AzəriLayt” yanvara 50,92, fevrala 56,68, marta 65,66, aprelə 64,25, maya 66,55, iyuna 70,57 dollarla başlayıb.

Ölkədə gündəlik xam neft hasilatı yanvar və fevralda 593 min barrel, martda 592,1 min barrel, apreldə 594 min barrel göstərilib. Beynəlxalq razılaşmaya əsasən, Azərbaycan gündəlik hasilatı iyunda 610 min barrel, iyulda 620 min barrel həcmində saxlamalıdır.