Bankı seçmək imkanı
İqtisadçı Rövşən Ağayev camaata əməkhaqqı, pensiya, sosial müavinət ödənişi üzrə xidmət göstərən bankları sərbəst seçmək imkanı verməyə çağırır. Novator.az-ın məlumatına görə, ekspert yazır ki, Gürcüstan hökumətinin “Liberty bank”la müqaviləsinə əsasən, son 5 ildə pensiyalar bu bank vasitəsilə ödənib: “Müqavilənin vaxtı bitir və hökumət yenidən bank seçimi olmayacağını bəyan edib, hər bir pensiyaçıya özünə bank seçmək sərbəstliyi verilib.
Bu təşəbbüs Azərbaycanda da gerçəkləşdirilməlidir. Əməkhaqqı, pensiya, sosial müavinət ödənişi üzrə xidmət göstərən bankları müştərilər özləri sərbəst seçə bilməlidir. Bu, bankları rəqabətə, müştəri uğrunda mübarizdə çeşidli xidmət və bank məhsulları təklif etməyə stimullaşdıracaq.
Xəzinə hesablarına xidmət də müsabiqə vasitəsilə olmalıdır. Bu hesablara xidmət üçün meyarlar müəyyən edilməli, açıq müsabiqədə həmin meyarları ödəyə bilən banklar xəzinə hesablarına xidmət etmək haqqı qazanmalıdırlar.
Büdcədən bank xidmətlərinə xərclənən vəsaitlərin həcmi 10 milyon manatlarla ölçülür. Hansısa bankların bu hüququ qeyri-şəffaf mühitdə, rəqabət olmadan imtiyaz kimi qazanması bank xidmətləri bazarında haqsız rəqabət yaradır. Normal bazar institutlarının və antiinhisar mexanizmlərinin işlədiyi ölkələrdə belə vəziyyətə dərhal müdaxilə edilir”.
