Koronavirus diaqnozu qoyulmayan da özünü yoluxmuş hesab edir
Rusiyada hər dörd nəfərdən biri koronavirus diaqnozu qoyulmadığı halda özünü bu infeksiyaya yoluxmuş hesab edir. Novator.az-ın məlumatına görə, bunu Rusiyanın “Levada” sorğu mərkəzinin keçirdiyi sosioloji sorğu göstərib.
Sorğu mayın 20-dən 26-dək Rusiyanın 50 bölgəsində 1620 nəfər arasında aparılıb.
Sorğuda iştirak edənlərin cəmi 7%-i COVİD-19 infeksiyasına yoluxandan sonra virus daşıyıcısı kimi rəsmi qeydiyyata alındığını söyləyib.
Respondentlərin 17%-i COVİD-19 infeksiyasına yoluxsa da, koronavirus xəstəsi kimi qeydiyatdan keçmədiyini etiraf edib.
Bu nəticələr ölkədə COVİD-19 infeksiyası ilə bağlı rəsmi statistikanın real vəziyyəti əks etdirmədiyi barədə şübhələri təsdiqləyir.
Sorğuda iştirak edənlərin 62%-i yerli istehsal olan “Sputnik V” vaksini ilə peyvənd olunmaqdan imtina etdiyini açıqlayıb.
Respondentlərin 11%-i ümumiyyətlə koronavirus əleyhinə peyvənd olunmaqdan ehtiyatlandığını, heç bir vaksinə etibar etmədiyini vurğulayıb.
“Levada”nın sorğusu rusiyalıların 55%-nin koronavirusa yoluxmaqdan qorxmadığını üzə çıxarıb. İnfeksiyaya yoluxmaqdan qorxanlar 42% təşkil edir.
Mərkəzi ofisi Fransa paytaxtında yerləşən “İpsos” beynəlxalq tədqiqat şirkətinin keçirdiyi, nəticələri bugünlərdə açıqlanan sorğu da rusların koronavirusdan qorxmayan xalqlardan biri olduğunu göstərib.
2019-cu ilin dekabrında Çində üzə çıxaraq dünyanı bürüyən yeni növ koronavirus infeksiyası 208 ölkə, ərazi və məkanda 3 milyon 752 mindən çox adamın ölümünə səbəb olub.
Rəsmi statistikaya görə, indiyədək Rusiyada 5 milyon 145 mindən çox adam koronavirusa yoluxub, onların 124 mindən çoxu vəfat edib.
Rusiya hökuməti bu ilin payızınadək əhalinin 70%-nin peyvəndlənməsini nəzərdə tutur. Ancaq prosesin ləng getməsi vaksinasiya prosesinin 2022-ci ilin sonuna, 2023-cü ilin əvvəlinə qədər uzanacağından xəbər verir.
Mənbə: Themoscowtimes.com
