İşğalçı Dağlıq Qarabağ rejiminin təqdim etdiyi statistikaya əsaslanan iqtisadçı alim, Azərbaycan Demokratiya və Rifah Hərəkatının sədri Qubad İbadoğlu yazır ki, 1995-2019-cu illərdə bölgədə əhalinin sayı 22,4 min nəfər artıb: “1995-1999-cu illərdə çoxalma, 2005-2006-cı illərdə durğunluq, 2012-2014-cü illərdə azalma müşahidə olunub.

Statistikadan görünür ki, Dağlıq Qarabağ ətrafındakı ərazilərdə məskunlaşma 1995-1999-cu illərdə başlayıb. Bu dövr ərzində Ermənistandan və xaricdən köç edən ermənilər əsasən Kəlbəcər, Laçın, Qubadlı, qismən də Füzuli, Cəbrayıl və Ağdam rayonlarında məskunlaşıblar.

2005-2006-ci ildə Dağlıq Qarabağdan xəfif, 2012-2014-cü illərdə böyük köç başlayıb. 2015-ci ildən müşahidə olunan artım, çox güman, təbii xarakter daşıyıb”.

Novator.az-ın məlumatına görə, Qubad İbadoğlu qeyd edir ki, 1995-ci ildə Dağlıq Qarabağın əhalisi 126,4 min nəfər, 2000-ci ildə 134,4 min nəfər, 2005-ci ildə 137,7 min nəfər, 2010-cu ildə 143,6 min nəfər, 2015-ci ildə 145,2 min nəfər, 2019-cu ildə 148,8 min nəfər göstərilib.

Ermənistan 1988-1994-cü illərin təcavüzündə Azərbaycanın Dağlıq Qarabağ bölgəsini (Xankəndi şəhəri, Şuşa, Xocalı, Xocavənd rayonları və keçmiş Ağdərə rayonu), eləcə də Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonlarını işğal edərək ərazidə özünü “müstəqil dövlət” sayan rejim qurub.

2020-ci il sentyabrın 27-dən Azərbaycanın apardığı hərbi əməliyyatlarda və noyabrın 10-na keçən gecə əldə olunan atəşkəs razılaşması nəticəsində ərazilərin böyük qismi azad olunub.

Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun bir hissəsi işğalda qalır.

Laçın şəhəri və rayonun 6 kəndi bölgədə atəşkəsə məsul Rusiya Ordusu bölmələrinin əlindədir.