Əlillik meyarları yenilənir
Milli Məclisə əlilliyin müəyyən olunması meyarları üzrə qanun layihələri paketi təqdim edilib. İyunun 4-də rəsmi arayış yayan Əmək və Əhalinin Sosial Müdafiəsi Nazirliyi bildirir ki, 2022-ci ildən tətbiqi nəzərdə tutulan yeni meyarlarla əlillik orqanizmin funksiyalarının itirilməsi faizinin müəyyən edilməsi prinsipi əsasında və xəstəliyin ağırlıq dərəcəsi nəzərə alınmaqla təyin olunacaq: “I dərəcə orqanizmin funksiyalarının 81-100 faiz itirilməsi, II dərəcə orqanizmin funksiyalarının 61-80 faiz itirilməsi, III dərəcə orqanizmin funksiyalarının 31-60 faiz itirilməsi kimi müəyyən ediləcək. Sağlamlıq imkanlarının məhdudluğu da bu əsasda təyin olunacaq.
Əlilliyin qiymətləndirilməsi şəxsin özünə qulluq, sərbəst hərəkət etmə, istiqamət seçmə, ünsiyyət, davranışına nəzarət etmə, öyrənmə və əmək fəaliyyəti üzrə məhdudlaşma dərəcəsi əsas götürülməklə aparılacaq”.
