Uşaq günündə
İyunun 1-i Uşaqları Beynəlxalq Müdafiə Günüdür. Novator.az-ın məlumatına görə, iqtisadçı alim, Azərbaycan Demokratiya və Rifah Hərəkatının sədri Qubad İbadoğlu yazır ki, ölkə əhalisinin 26,5 faizi 18 yaşadək uşaqlardır: “Son 20 ildə bu yaş qrupu üzrə uşaqların sayı 300 min nəfərədək, cəmi əhalidə xüsusi çəkisi 2,5 faiz bəndindən çox azalıb. Uşaqların sayının azalması xüsusilə şəhərlərdə xarakterik hal alıb. Bunun bir səbəbi də uşaqlara dövlət qayğısının yetərli olmamasıdır. Yoxsulluq əsasən çoxuşaqlı ailələrə xasdır, amma belə ailələr üçün əvvəllər olmuş güzəştlərin bir hissəsi aradan qaldırılıb. Azərbaycan yerləşdiyi coğrafiyada uşaqlara sosial müavinət ödəməyən azsaylı ölkələrdəndir.
Ölkədə uşaqların təhsil və səhiyyə təminatında problemlər var. Xüsusilə kənd rayonlarında uşaqlar təhsilin yuxarı siniflərində məktəbdən ayrılır və ailələrinə maddi kömək olmaq üçün aqrar təsərrüfatlarda çalışırlar.
Uşaqlar arasında qan, həzm, sinir sistemi xəstəliklərinin dinamikası davamlı olaraq artır.
Əksər ailələrdə uşaqların ayrıca otaqları yoxdur. Uşaq istirahət düşərgələri özəlləşdirilib, onların profili dəyişdirilib.
Bütün bunlarla yanaşı uşaqların ailədə və məktəbdə hüquqları pozulur. Onların fərdi inkişafı üçün lazım olan azadlıqlar tanınmır.
Bir sözlə, uşaqların bir çoxu hüquq və azadlıqlar baxımından təminatlı deyillər. Çünki dövlət, cəmiyyət, məktəb, ailə onların hüquqlarının qorunması üçün lazım olanların əksəriyyətini etmir”.
Azərbaycan əhalisinin sayı 2021-ci il aprelin 1-nə 10 milyon 130 min 114 nəfərə çatıb. Dövlət Statistika Komitəsinin hesabatına görə, yanvar-mart aylarında 29484 doğulan körpə qeydə alınıb.
Azərbaycanda uşağın anadan olmasına 200 manat birdəfəlik müavinət düşür. 18 yaşa qədər şəxslərə hər ay uşaq pulunun verilməsi 2006-cı ildən dayandırılıb.
