Çində bir ailədə üç uşağın olmasına icazə verilir – “Reuters”
Çində ailələrə üç uşaq sahibi olmağa icazə verilir. Novator.az saytı “Reuters” agentliyinə istinadla bildirir ki, ölkəni idarə edən Kommunist Partiyası belə bəyanat verib.
Bəyanat Kommunist Partiyası Siyasi Bürosunun mayın 31-də keçirilən iclasından sonra yayılıb.
Çində 40 ildən çoxdur əhali artımını tənzimləmək məqsədilə ailələrdə uşaq sayına məhdudiyyətlər tətbiq edilir. 1980-ci ildən hər ailədə bəzi istisnalarla yalnız bir uşağın olmasına icazə verilib. 2016-cı ildən hər ailəyə iki uşağın olmasına icazə verən qanun qüvvədədir.
Son illərdə bu məhdudiyyətlər Çin dövlətinə yeni problemlər yaradıb: ölkədə qocaların sayı artmağa, əhalinin işləyən hissəsinin sayı azalmağa başlayıb. Bir ailədə üç uşağın olmasına icazə verilməsi haqda yeni qərarın bu prosesin qarşısını almaq məqsədi daşıdığı şübhə doğurmur.
Hakim Kommunist Partiyası bəyanat yaysa da, ailələrdə üç uşağın olmasına nə vaxtdan icazə veriləcəyi hələ bilinmir.
Hazırda Çin əhalisinin sayı 1 milyard 410 milyon nəfərdən çoxdur.
Mənbə: Reuters.com
