Karantin yumşaldılır
Nazirlər Kabineti yanında operativ qərargahın 25 may məlumatına görə, koronavirus infeksiyasını cilovlamaq üçün tətbiq edilən xüsusi karantin rejimi yumşaldılır.
Mayın 31-dən bölgələr arasında ictimai nəqliyyatla sərnişin daşınmasına qadağa götürülür, Bakı Metropoliteni açılır, açıq məkanlarda tibbi maska taxmaq tələbi ləğv olunur, iyunun 10-dan ibadət yerlərinin, iri ticarət mərkəzlərinin, çimərliklərin, idman və sağlamlıq-bərpa müəssisələrinin fəaliyyətinə icazə verilir.
Başqa bir məlumata görə, Azərbaycanda koronavirus pasportu tətbiq olunacaq. Pasport iki sertifikatdan ibarətdir. Peyvəndlənmə sertifikatı vaksinin hər iki dozasını alan şəxslərə, immunitet sertifikatı xəstələnib sağalmış şəxslərə veriləcək.
Novator.az bildirir ki, xüsusi karantin rejimi 2020-ci il martın 31-dən hökm sürür. Ölkəyə giriş-çıxış məhdudlaşıb, dəfn istisna olmaqla yas mərasimləri, kütləvi tədbirlər (tamaşaçıların iştirakı olmadan açıq havada idman yarışları istisnadır), ad günləri, toy, nişan və bu kimi mərasimlər yasaqlanıb, ictimai nəqliyyatın hərəkəti məhdudlaşıb, başqa qadağalar qoyulub.
2019-cu ilin dekabrında Çində üzə çıxaraq dünyanı bürüyən infeksiyaya Azərbaycanda ilk yoluxma 2020-ci il fevralın 28-də qeydə alınıb.
2021-ci il mayın 24-nə olan milli hesabata görə, Azərbaycanda ümumilikdə 332610 nəfər koronavirus infeksiyasına yoluxub, onların 4867-si vəfat edib.
Ölkədə koronavirus infeksiyasına qarşı vaksinasiya 2021-ci il yanvarın 18-də başlayıb. Son rəsmi məlumata görə, 852 min nəfərdən çox şəxs peyvəndlənmə prosesini bitirib.
