Azərbaycanın Konstitusiya Məhkəməsi ombudsmanın sorğusu əsasında Cinayət Məcəlləsinin 85.3-cü və 85.4-cü maddələrinin ana qanunun 17-ci maddəsinin V hissəsinə uyğunluğunu yoxlayıb.

Novator.az bildirir ki, Cinayət Məcəlləsinin 85.3-cü maddəsinə görə, ictimai işlər səksən saatdan üç yüz iyirmi saatadək müddətə təyin olunur və yetkinlik yaşına çatmayan məhkumun bacardığı, onun təhsildən və əsas işindən asudə vaxtlarda yerinə yetirdiyi işlərdən ibarətdir. Bu cəza növünün icra müddəti on beş yaşınadək şəxslər üçün gündə iki saatdan, on beş yaşından on altı yaşınadək şəxslər üçün isə gündə üç saatdan çox ola bilməz.

85.4-cü maddəyə əsasən, yetkinlik yaşına çatmayanlara islah işləri iki aydan bir ilədək müddətə təyin edilir. Bu zaman məhkumun qazancından məhkəmənin hökmü ilə müəyyən edilmiş miqdarda, beş faizdən iyirmi faizə qədər pul dövlət nəfinə tutulur.

Konstitusiyanın 17-ci maddəsinin V hissəsi 15 yaşına çatmamış uşaqların işə götürülməsini yasaqlayır.

Mayın 17-də yayılan rəsmi bilgidə qeyd olunur ki, Konstitusiya Məhkəməsinin Plenumu Cinayət Məcəlləsinin 85.3-cü və 85.4-cü maddələrinin ana qanunun 17-ci maddəsinin V hissəsi ilə ziddiyyət təşkil etmədiyi qənaətinə gəlib. Qərara görə, məhkəmələr ilk dəfə böyük ictimai təhlükə törətməyən və ya az ağır cinayət törətmiş 15 yaşınadək şəxslərə ictimai işlər cəzasının təyin olunması məsələsini həll edərkən ilk növbədə onların Cinayət Məcəlləsinin 88.1-ci maddəsinə uyğun olaraq cinayət məsuliyyətindən azad edilməsinə üstünlük verməlidir.

Həmin maddəyə əsasən, yetkinlik yaşına çatmayan ilk dəfə böyük ictimai təhlükə törətməyən və ya az ağır cinayət etdikdə, tərbiyəvi xarakterli məcburi tədbirlər tətbiq etməklə onun islah olunması mümkün hesab edilərsə, həmin şəxs cinayət məsuliyyətindən azad edilə bilər.