Türkiyənin daxili işlər nazirinə Bayram Məmmədov sorğusu
Türkiyə Böyük Millət Məclisinin deputatı, Xalqların Demokratik Partiyasının üzvü Murad Çepni azərbaycanlı ictimai fəal Bayram Məmmədovun həlak olması məsələsini qaldırıb, ölkənin daxili işlər naziri Süleyman Soyluya suallar ünvanlayıb.
Bayram Məmmədov başqa ictimai fəal Qiyas İbrahimovla birgə 2016-cı il mayın 10-u Bakıda tutulub. Onlar külli miqdarda narkotik vasitə saxlamaqda təqsirli bilinərək 10 il müddətinə azadlıqdan məhrum ediliblər. Sonradan Qiyas İbrahimovun cəzası 3 ay artırılıb.
Müdafiəçiləri fəalların həbsini siyasi sifariş sayıb, bildiriblər ki, 2016-cı il mayın 10-na keçən gecə mərhum prezident Heydər Əliyevin Bakının mərkəzindəki abidəsinə etiraz şüarları yazılıb, gənclər bu şüarlara görə tutulublar.
2019-cu il martın 17-də hər iki gənc prezidentin əfv sərəncamı ilə azadlığa buraxılıb.
2021-ci ildə Türkiyənin İstanbul şəhərinə gedən Bayram Məmmədov mayın 2-si orada yoxa çıxıb. Axtarış üçün polisə müraciət edən dostlarına onun öldüyü, meyitinin dənizdən tapıldığı bildirilib.
Polisin məlumatına görə, Bayram Məmmədov Kadiköy rayonundakı Moda parkında gəzişərkən dənizə düşən başmağını götürmək üçün suya girəndə batıb. Hadisəni görənlər bildirib ki, üzə bilməyən sahil mühafizə xidmətinin əməkdaşı aidiyyəti qurumlara xəbər verib, ancaq onlar gələnədək Bayram Məmmədov boğulub.
Bayram Məmmədov mayın 9-u Bakıda dəfn olunub.
Meydan.tv xəbər verir ki, deputat Murad Çepni daxili işlər nazirinə müraciətində Bayram Məmmədovla birgə tutulub məhkum edilmiş Qiyas İbrahimovun 2021-ci ilin aprelində Türkiyədən deportasiya edildiyini xatırladıb: “Bundan bir müddət sonra isə İstanbulda Bayram Məmmədovun meyiti tapılıb. Dostları Milli Kəşfiyyat Təşkilatının onu izlədiyini və bir dəfə İstanbul hava limanında məmurun sorğu-sualına məruz qaldığını söyləyir”.
Murad Çepni Bayram Məmmədovun ölümü ilə əlaqədar ətraflı araşdırmalar aparılmasını istəyib. Onun daxili işlər nazirinə əsas sualları bunlardır:
– Bayram Məmmədovun şübhəli ölümü ətraflı araşdırılacaqmı? Hadisəni törədənlər müəyyən edilərsə, ictimaiyyət bu barədə məlumatlandırılacaqmı?
– Polis idarəsi Bayram Məmmədovun başmağının arxasınca dənizə atıldığını necə aşkar edib? Bunun təhlükəsizlik kameralarında görüntüləri varmı?
– Bu hadisədə səhlənkarlıq etdiyi iddia olunan polis və sahil mühafizə əməkdaşlarına qarşı istintaq açılıbmı?
– Milli Kəşfiyyat Təşkilatının Bayram Məmmədovu izlədiyi və İstanbulun hava limanında bir məmurun onu dindirdiyi iddiaları var. Bu iddialar araşdırılacaqmı?
– Azərbaycan hökuməti ilə Bayram Məmmədovun ölümü üzrə görüş olubmu? Hadisənin bütün aspektlərini araşdırmaq üçün Azərbaycan hökuməti ilə əməkdaşlıq edilibmi?
Bayram Məmmədovun ölümü ilə bağlı məlumat yayılıb
Bayramın ölümündən nə yazırlar?
