İki ölkə, dörd komanda
UEFA Avropa Liqasının yarımfinal raundu bitib. Novator.az-ın məlumatına görə, mayın 6-da keçirilmiş cavab oyunlarında “Mançester Yunayted” və “Vilyarreal” finala vəsiqə alıblar.
Finala mayın 26-da Polşanın Qdansk şəhəri ev sahibliyi edəcək.
1971-ci ildən keçirilən, 2008-ci ilədək UEFA kuboku adlanmış turnirdə 28 klubun zəfəri var: “Sevilya” 6, “Liverpul”, “Yuventus”, “İnter” (İtaliya), “Atletiko” 3, “Tottenhem”, “Feyenoord”, “Borussiya” (Mönhenqladbah), “Höteborq”, “Real” (Madrid), “Parma”, “Portu”, “Çelsi” 2, “Anderlext”, “Ayaks”, PSV, “Ayntraxt” (Frankfurt), “İpsviç”, “Bayer”, “Napoli”, “Bavariya”, “Şalke”, “Qalatasaray”, “Valensiya”, SSKA (Rusiya), “Zenit”, “Şaxtyor” (Ukrayna), “Mançester Yunayted” 1 uğur qazanıb.
2020-2021 mövsümündə UEFA-nın klub turnirlərinə 237 komanda buraxılıb. İndi onların 4-ü mübarizədədir (Çempionlar Liqasının finalına “Mançester Siti” ilə “Çelsi” çıxıb).
55 UEFA üzvünün 2-si turnirlərdə təmsil olunur. İngiltərə 3, İspaniya 1 komanda ilə yarışır.
Cari klub reytinqinə 100,140 əmsalla İngiltərə başçılıq edir. Reytinq Çempionlar Liqası və Avropa Liqasında son beş mövsümdə qazanılan əmsala əsaslanır. Qələbə maksimum 2 xal, heç-heçə maksimum 1 xaldır. Çempionlar Liqasının qrup mərhələsi 4 bonus xalı, 1/8 finalı 5 bonus xalı, hər iki turnirin 1/4 finalı, yarımfinalı və finalı 1 bonus xalı verir.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
