Görüş və işçi nahar
Prezident İlham Əliyev mayın 5-i Bakıda Azərbaycana səfər edən Gürcüstanın baş naziri İrakli Qaribaşvili ilə görüşüb. AZƏRTAC xəbər verir ki, İlham Əliyev iki xalqın münasibətlərinin uzun tarixə, əsrlər boyu davam edən yaxşı qonşuluq və dostluq tarixinə əsaslandığını vurğulayıb: “Bu, böyük dinamikanı nümayiş etdirən və faktiki olaraq bir çox sahəni əhatə edən cari münasibətlərimizin inkişafı üçün çox yaxşı zəmindir. Bizim enerji və nəqliyyat layihələri kimi birgə layihələrin icrası üzrə yaxşı tariximiz var. Bu layihələr regionun siyasi, iqtisadi, nəqliyyat və energetika xəritəsini dəyişib. Ölkələrimiz arasında güclü tərəfdaşlıq olmasaydı, bu layihələrin icrası mümkün olmazdı.
Ötən ilin sonuncu günü Cənub Qaz Dəhlizi layihəsinin icrasının sonuncu günü idi. Bu layihə təkcə Cənubi Qafqaz regionunda yox, daha geniş Avrasiya regionunda ümumi inkişaf, sabitlik, proqnozlaşdırma, əməkdaşlıq üçün mühüm əhəmiyyət kəsb edir. Bu vacib layihənin icrasına davamlı dəstək göstərdiyinə görə Gürcüstan hökumətinə dərindən minnətdaram. Bizim birlikdə start verdiyimiz bütün digər təşəbbüslərin də yaxşı uğur hekayəsi var. Əminəm ki, gələcəkdə də belə olacaq.
Azərbaycan Gürcüstan iqtisadiyyatında ən böyük investorlardan biri olmağa davam edir. Bu da həmçinin çox müsbət və əlverişli investisiya mühitinin yaradılmasında sizin hökumətinizin həyata keçirdiyi islahatların yaxşı göstəricisidir. Daha da çox Azərbaycan şirkəti sizin ölkənizdə çalışmaq istəyir və əminəm ki, bu baş verəcək”.
İrakli Qaribaşvili deyib ki, iki ölkənin mükəmməl münasibətləri var və münasibətlər əsrlər boyu davam edir: “Biz bir-birimizə çox bağlıyıq və qarşılıqlı əlaqədəyik. Birlikdə bəzi ən mühüm əhəmiyyət kəsb edən tarixi layihələri icra etmişik. Ona görə də biz münasibətlərimizi və qardaşlığımızı gücləndirəcək daha çox layihələrin birgə icrasını davam etdirməkdə tamamilə qətiyyətli və həvəsliyik”.
Görüşdən sonra İlham Əliyev və İrakli Qaribaşvili işçi nahar ediblər.
1982-ci il təvəllüdlü İrakli Qaribaşvili 2012-2013-cü illərdə daxili işlər naziri, 2013-2015-ci illərdə baş nazir olub, 2019-cu ildən müdafiə naziri postunu tutub. 2021-ci ilin fevralında yenidən baş nazir vəzifəsinə gətirilib.
