QHT Agentliyinin Müşahidə Şurasına üzvlər təyin olundu
Aprelin 28-də sərəncam imzalayan prezident İlham Əliyev Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının tərkibini rəsmiləşdirib. Novator.az bildirir ki, quruma dövlət orqanlarından Vüsal Quliyev (Prezident Administrasiyasının qeyri-hökumət təşkilatları ilə iş və kommunikasiya şöbəsinin qeyri-hökumət təşkilatları ilə iş sektorunun böyük məsləhətçisi), İlqar Məmmədov (Ədliyyə Nazirliyinin Qeydiyyat və Notariat Baş İdarəsinin rəisi), Zakir Hacıyev (Maliyyə Nazirliyinin təhsil, elm, mədəniyyət, gənclər və idman sahələrinin maliyyəsi şöbəsi müdirinin müavini) daxil olub.
Qeyri-hökumət təşkilatlarının təmsilçiləri bunlardır: Azər Allahverənov, Əvəz Həsənov, İsrayıl İsgəndərov, Zaur İbrahimov, Azay Quliyev, Nurəddin Mehdiyev, İlqar Orucov, Günel Səfərova.
Prezidentin 19 aprel 2021-ci il fərmanı ilə Qeyri-Hökumət Təşkilatlarına Dövlət Dəstəyi Şurasının əsasında Qeyri-Hökumət Təşkilatlarına Dövlət Dəstəyi Agentliyi publik hüquqi şəxs qurulub (Nizamnamə).
Agentliyin fəaliyyətinə ümumi rəhbərliyi və nəzarəti prezidentin vəzifəyə təyin və vəzifədən azad etdiyi 11 üzvdən ibarət Müşahidə Şurası həyata keçirir.
Müşahidə Şurasının 8 üzvü qeyri-hökumət təşkilatlarını, 3 üzvü dövlət orqanlarını təmsil edir.
Agentliyin fəaliyyətinə cari rəhbərlik Müşahidə Şurasının vəzifəyə təyin və vəzifədən azad etdiyi icraçı direktora həvalə olunacaq.
Qurumun saxlanma xərcləri və fəaliyyəti dövlət büdcəsi və qanunla qadağan olunmayan digər mənbələr hesabına maliyyələşəcək.
Qeyri-Hökumət Təşkilatlarına Dövlət Dəstəyi Şurası prezidentin 13 dekabr 2007-ci il fərmanı ilə yaradılıb, quruma 2008-ci ildən Azay Quliyev sədrlik edib. 1971-ci il təvəllüdlü Azay Quliyev 2005-ci ildən Milli Məclisin üzvüdür.
