Tanınmış jurnalist Səbinə Əvəzqızı müalicəsinə verilən dəstəyə görə prezident İlham Əliyevə və birinci vitse-prezident Mehriban Əliyevaya təşəkkür edib. O, aprelin 20-də özünün “Facebook” səhifəsində yazır ki, bir müddət əvvəl xərçəng xəstəliyinə tutulub: “Problemdən xəbər tutan kimi həmkarlarım dərhal toplandı, media ictimaiyyəti və ictimai xadimlər prezident İlham Əliyevə müraciət ünvanladılar. Müraciət yayılandan bir neçə dəqiqə sonra mənə zəng etdilər, müalicəmə dəstək göstəriləcəyi bildirildi, Türkiyədə müayinə olunmağım təmin edildi, orada kimya terapiyasının ilk mərhələsini aldım.

Bütün bu günlərdə dövlətin diqqətini hər an hiss etdim. Bu diqqət üçün prezident İlham Əliyevə və birinci vitse-prezident Mehriban Əliyevaya xüsusi təşəkkür edirəm. Bir insan üçün həyatının təhlükə qarşısında qaldığı anlarda üz tutacağı dövləti, dəstəyi olmasını bilməsi çox böyük güvəndir. Ən çətin anımızda illərlə xidmət etdiyimiz dövlətimiz, prezidentimiz bizi tək qoymur. Bu dəfə də belə oldu”.

1990-cı illərdən jurnalist fəaliyyəti ilə məşğul olan Səbinə Əvəzqızı Lent.az saytının redaktorudur. Əvvəllər “Yeni Müsavat”, “Gün səhər”, “Həftə içi” qəzetlərində çalışıb.