Qeyri-Hökumət Təşkilatlarına Dövlət Dəstəyi Agentliyi yaradılır
Qeyri-Hökumət Təşkilatlarına Dövlət Dəstəyi Şurasının statusu dəyişir.
Prezident İlham Əliyevin 13 dekabr 2007-ci il fərmanı ilə yaradılan quruma 2008-ci ildən Azay Quliyev sədrlik edir. 1971-ci il təvəllüdlü Azay Quliyev 2005-ci ildən Milli Məclisin üzvüdür.
Dövlət başçısının 19 aprel 2021-ci il fərmanı ilə şuranın əsasında Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi publik hüquqi şəxs qurulur (Nizamnamə).
Agentliyin fəaliyyətinə ümumi rəhbərliyi və nəzarəti prezidentin vəzifəyə təyin və vəzifədən azad etdiyi 11 üzvdən ibarət Müşahidə Şurası həyata keçirəcək.
Müşahidə Şurasının 8 üzvü qeyri-hökumət təşkilatlarını, 3 üzvü dövlət orqanlarını təmsil edəcək.
Agentliyin fəaliyyətinə cari rəhbərlik Müşahidə Şurasının vəzifəyə təyin və vəzifədən azad etdiyi icraçı direktora həvalə olunacaq.
Qurumun saxlanma xərcləri və fəaliyyəti dövlət büdcəsi və qanunla qadağan olunmayan digər mənbələr hesabına maliyyələşəcək.
