Pulsuz maska təklifi
Report.az-ın təqdim etdiyi statistikaya əsaslanan iqtisadçı Natiq Cəfərli yazır ki, koronavirus pandemiya elan olunandan – 2020-ci ilin martından bu ilin eyni ayına qədər Azərbaycanda 77,6 milyon ədəd tibbi maska satılıb: “10 yaşa qədər şəxslərin çox vaxt maska taxmadığını nəzərə alsaq, deməli, il ərzində təqribən 8,5 milyon nəfər maskadan istifadə etməli idi. Tibbi maskaların iki-üç saatdan bir dəyişmək lazım olduğu deyilir. Bu hesabla hər vətəndaş gün ərzində azı üç maska dəyişməli, günə 25,5 milyon ədəd, aya 765 milyon ədəd, ilə 9 milyard 180 milyon ədəd maskadan istifadə olunmalı idi.
Bizdə bir ilə 77,6 milyon maska satılıb. Hər adama 9 maska düşür. Deməli, vətəndaş bir maskanı 40 gün taxıb. Maskadan belə istifadə nəinki virusdan qorumur, hətta yeni xəstəliklər üçün şərait yaradır!
Əhaliyə pulsuz maska paylanmalıdır ki, qapalı məkanlarda, nəqliyyatda maska taxılsın. Hər vətəndaşa heç olmasa aya 10 maska pulsuz verilməlidir, camaat pulsuzdur, həm virus, həm cərimə qorxusundan bir maskanı 40 gün taxır, bu zülmdür, sağlamlıq problemlərinin təməlidir. Açıq havada maska taxmaq tələbi isə ləğv edilməlidir!”
Azərbaycanda koronavirus pandemiyası üzündən xüsusi karantin rejimi hökm sürür. Bütün qapalı və açıq məkanlarda tibbi maskalardan istifadə məcburidir.
Novator.az bildirir ki, İnzibati Xətalar Məcəlləsinə əsasən, epidemiya əleyhinə, sanitariya-gigiyena və karantin rejimləri dövründə tənəffüs yollarını qoruyan fərdi vasitələrdən istifadə tələblərinin pozulmasına, habelə həmin tələblərin pozulmasının qarşısını almamağa görə fiziki şəxslərə 100 manat məbləğində, vəzifəli şəxslərə 300 manat məbləğində, hüquqi şəxslərə 600 manat məbləğində cərimə tətbiq edilir.
Xətanı inzibati tənbeh almış şəxsin il ərzində təkrar törətməsi halında fiziki şəxslərə 200 manat məbləğində, vəzifəli şəxslərə 600 manat məbləğində, hüquqi şəxslərə 1200 manat məbləğində cərimə düşür.
Tibbi maskanın qiyməti 20-30 qəpik arasında dəyişir.
