Ölümün yaşı
İqtisadçı Rövşən Ağayev Azərbaycanın demoqrafik durumu ilə statistikaya diqqət çəkib. Novator.az-ın məlumatına görə, ekspert yazır ki, 27 ölkəni birləşdirən Avropa İttifaqı məkanında ölümlərin 18%-i 65 yaşa qədər, 82%-i 65 yaşdan sonra baş verir: “Azərbaycanda bu sahədə vəziyyət çox kritikdir. 2019-cu ildə ölümlərin 41%-i 65 yaşa qədər rəsmiləşib. 1990-2005-ci illərdə bu statistika xeyli yaxşılaşmış, 15 il ərzində 58%-dən 38%-ə düşmüşdü. 2006-cı ildən sonra 65 yaşa qədər ölümlərin xüsusi çəkisi artmağa başlayıb və 2019-cu ildə yenidən ən yüksək səviyyəyə çatıb.
Qadın və kişilər üzrə bu göstərici əhəmiyyətli dərəcədə fərqlidir. 1990-2005-ci illərdə kişilər arasında ölümlərdə 65 yaşadək ölümlərin xüsusi çəkisi 68%-dən 47%-ə ensə də, 2019-cu ildə 50%-ə yüksəlib. Yəni vəfat edən hər iki kişidən biri 65 yaşına çatmamış həyatını itirir.
1990-2005-ci illərdə qadınlar arasında ölümlərdə 65 yaşadək ölümlərin xüsusi çəkisi 46%-dən 29%-ə enib. Sonrakı 15 ildə bu göstəricidə elə ciddi dəyişiklik olmayıb və 2019-cu ildə 30% təşkil edib. Yəni hazırda vəfat edən hər 100 qadından cəmi 30 nəfəri 65 yaşadək həyata vida edir”.
Dövlət Statistika Komitəsinin hesabatına görə, 2021-ci ilin yanvar ayı ərzində ölkədə 7972 ölüm halı qeydə alınıb. 2020-ci ilin ilk ayı ilə müqayisədə doğum ölüm halları 54,1 faiz artıb. Əhalinin təbii artımı (doğulanlar və ölənlərin nisbəti) üzrə 54,8 faiz geriləmə var.
