Gənclərin payı, ən gənc bölgələr
Azərbaycanın “Gənclər siyasəti haqqında” qanununa görə, yaşı 14-dən 29-dək şəxslər gənc kimi tanınır. Novator.az-ın məlumatına görə, rəsmi statistikaya əsaslanan iqtisadçı Rövşən Ağayev yazır ki, 14-29 yaşlı şəxslərin Azərbaycan əhalisində payı 23,7%-dir: “Ən gənc bölgələr Yardımlı, Xocavənd və Xocalıdır – hər üç rayonda 14-29 yaş qrupunun payı 29% ətrafındadır. Bu baxımdan ən aşağı göstəricilər Bakı (20,4%), Mingəçevir (21,3%), Sumqayıt (21,5%) və Naftalan (21,6%) şəhərlərində qeydə alınıb.
14-29 yaşlı gənclərdə qızların payının ən yüksək olduğu bölgə Şahbuz rayonudur – 54,1%. Naftalan şəhəri 45,2%-lə qızların ümumi əhalidə payının ən aşağı olduğu bölgədir”.
2021-ci il fevralın 1-nə Azərbaycan əhalisinin sayı 10 milyon 122 min 148 nəfər göstərilib. Dövlət Statistika Komitəsi bildirir ki, yanvar ayında 10812 körpə doğulub, onların 53,4 faizi oğlan, 46,6 faizi qızdır.
2020-ci ilin ilk ayı ilə müqayisədə doğum 5,2 faiz azalıb.
