Yoluxmalar, itkilər
Son rəsmi hesabatda Azərbaycanda koronavirus infeksiyasına yoluxanlar 279181 nəfər, xəstəlik qurbanları 3811 nəfər göstərilib.
Novator.az bildirir ki, yoluxmaların 17468-i, ölümlərin 244-ü bu ayın payına düşür.
2019-cu ilin dekabrında Çində üzə çıxaraq dünyanı bürüyən koronavirusa ölkədə ilk yoluxma 2020-ci il fevralın 28-də qeydə alınıb. Həmin il 218700 nəfər yoluxub, 2641 xəstə həyatını itirib.
2021-ci ilin yanvarında 11519 yoluxma, 491 ölüm; fevralında 4318 yoluxma, 88 ölüm; martında 27176 yoluxma, 347 ölüm olub.
2020-ci il martın 31-dən xüsusi karantin rejimi tətbiq edilir. Hazırda əsas qadağalar bunlardır: yük daşımaları istisna olmaqla ölkəyə giriş-çıxış; şəhər və rayonlardan sərnişin daşınması; “ASAN xidmət” və “DOST” mərkəzləri istisna olmaqla dövlət orqanlarında (qurumlarında) vətəndaşların yerində qəbulu; dəfn mərasimləri istisna olmaqla yas mərasimləri; kütləvi tədbirlər (tamaşaçıların iştirakı olmadan açıq havada idman yarışları istisnadır); tədbirlərin təşkili, o cümlədən ad günləri, toy, nişan və bu kimi mərasimlər; ictimai yerlərdə, o cümlədən küçələrdə, bulvarlarda, parklarda və digər yerlərdə şəxslərin (ata-ana, nənə-baba, uşaqlar və bacı-qardaşlar istisna olmaqla) 10 nəfərdən artıq qruplarda cəmləşməsi; istirahət və əyləncə məkanlarının, həmçinin uşaq əyləncə məkanlarının (bulvar və parkların ərazisindəki daxil olmaqla) fəaliyyəti; muzey və sərgi zalları istisna olmaqla mədəniyyət obyektlərinin, eləcə də kinoteatrların, teatrların və idman zallarının fəaliyyəti; tibb müəssisələrində müalicə alan şəxslərin ziyarəti; idman, sağlamlıq-bərpa üzrə xidmətlər (bu sahədə tibbi xidmətlər istisna olmaqla); masaj və hamam xidmətlərinin göstərilməsi; şənbə və bazar günlərində ictimai nəqliyyatın hərəkəti; Bakı Metropolitenində sərnişindaşıma.
Pandemiya dövründə ən ağır ay 2020-ci ilin dekabrına düşüb. Həmin ay 97524 yoluxma, 1249 ölüm rəsmiləşib.
