16 yaşlı qız Qubad İbadoğluna nə yazır?
Azərbaycan Demokratiya və Rifah Hərəkatının sədri, iqtisadçı alim Qubad İbadoğlu azərbaycanlı qızın ona yazdığı elektron məktubu özünün “Facebook” səhifəsində paylaşıb. Məktubda deyilir:
– Salam. Mənim 16 yaşım var. 3 bacıyıq. 2003, 2005, 2006-cı il təvəllüdlü. Anamla atam 7 ildir ayrılıblar. Atam bizimlə maraqlanmır. Kirayədə qalırıq. 1000 manata yaxın evpulu borcu yığılıb. Maddi durumumuz çox zəif olduğuna görə ödəyə bilmirik.
Anam dəfələrlə ünvanlı sosial yardım almaq üçün müraciət edib. Hər dəfəsində müxtəlif bəhanələr gətirirlər. Müxtəlif yerlərə müraciət etmişik. Heç kəs bizim müraciətimizə baxmır. Anam illərdir ki, dövlət qurumlarının yollarında qalıb. Haqqımız olanı almaq üçün, çörəkpulu çıxarmaq üçün.
Anam heç bir yerdə işləmir. Heç bir yerdən gəlirimiz yoxdur. Maddi durumumuz çox çətindir. Mənim də arzularım, xəyallarım var, lakin olduğum durum, yaşayış buna əngəldir. İstəyirəm anam əziyyət çəkməsin. İşləri asan düzəlsin. Müraciətlərimizə ciddi yanaşılsın. Bu ölkədə yaşayırıqsa, bu ölkənin vətəndaşlarıyıqsa, bizə də nəzər yetirsinlər.
Bilmirəm siz bizə necə kömək edəcəksiniz. Ümid edirəm ki, səsimə səs verəcəksiniz. Mən hələ də yaxşı insanların var olduğuna inanıram.
Novator.az-ın məlumatına görə, Qubad İbadoğlu vətəndaşlara səslənərək yazır:
– Sizcə, bu uşaqların günahı Azərbaycanda doğulmaqlarıdırmı? Onlara hansı dövlət sahib çıxmalıdır?
Belələri Azərbaycanda minlərlə, bəlkə də on, yüz minlərlədir. Kim bilir ki, maraqlanan varmı? Onların heç də hamısı səsini çıxara və yaza bilmir.
Mən belə halları bildiyimdən uşaq pulu davası aparıram (Uşaq pulu arqumentləri).
