“AzəriLayt”ın aprel startı
Energetika Nazirliyinin 1 aprel məlumatına görə, “AzəriLayt” markalı Azərbaycan neftinin bir barreli 64,25 dollara satılır.
Novator.az bildirir ki, Azərbaycanın 2021-ci il büdcəsində bir barrel neftin qiyməti 40 dollardan götürülüb. “AzəriLayt” yanvara 50,92, fevrala 56,68, marta 65,66 dollarla başlayıb.
Yanvar və fevral aylarının gündəlik xam neft hasilatı 593 min barrel göstərilib.
Beynəlxalq razılaşmaya görə, Azərbaycan 2021-ci il mayın 1-dək gündəlik xam neft hasilatını 595 min barrel həcmində saxlamalıdır. Bu, OPEK ölkələri (Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və 10 qeyri-OPEK ölkəsinin (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) birgə qərarı əsasında müəyyənləşmiş həddir.
2021-ci ilin yanvar-fevral ayları üzrə operativ məlumatlara əsasən, Azərbaycanda 5,8 milyon ton neft (kondensatla birlikdə) çıxarılıb, hasilat ötən ilin müvafiq dövrü ilə müqayisədə təxminən 342 min ton azalıb. İki ayda 4,8 milyon ton neftin (kondensatla birlikdə) ixraca nəql olunduğu bildirilir.
