Xarici İşlər Nazirliyinin Mətbuat Xidməti İdarəsinin rəsmi məlumatına görə, 1 aprel 2021-ci ildən Azərbaycan vətəndaşları pasportlar (diplomatik, xidməti, adi), eləcə də biometrik şəxsiyyət vəsiqəsi əsasında Türkiyəyə vizadan azad səyahət edə bilər: “Etibarlı sənədləri olan Azərbaycan vətəndaşları Türkiyə ərazisinə daxil olmaq, tranzit keçmək və orada qalmaq üçün 90 gün müddətinə viza tələbindən azad edilirlər.
Türkiyə ərazisindən üçüncü ölkələrə və üçüncü ölkələrdən Türkiyə ərazisinə daxil olmaq üçün pasportlardan istifadə məcburidir. Biometrik şəxsiyyət vəsiqəsi yalnız Azərbaycan ərazisindən Türkiyəyə birbaşa səyahətlər üçün istifadə ediləcək.
Azərbaycan vətəndaşının biometrik şəxsiyyət vəsiqəsi, eləcə də digər sənədləri Türkiyə ərazisinə giriş tarixindən etibarən ən az 30 gün etibarlılıq müddətinə malik olmalıdır.
Türkiyə ərazisində hər hansı səbəbdən 90 gündən artıq müddətdə qalmaq istəyən Azərbaycan vətəndaşları yaşamaq icazəsi almaq üçün tələb olunan müddətdən azı 60 gün daha çox etibarlı olan pasportla müraciət etməlidir”.
