Şəhərsalma və Arxitektura Komitəsinin səlahiyyətləri artdı
Martın 18-də fərman imzalayan prezident İlham Əliyev işğaldan azad edilmiş ərazilərdə şəhərsalma fəaliyyəti sahəsində idarəetmə qaydasını yeniləyib. Sənədə əsasən, işğaldan azad edilmiş ərazilərdə bu səlahiyyətlərin həyata keçirilməsi müvəqqəti olaraq Dövlət Şəhərsalma və Arxitektura Komitəsinə həvalə edilir:
– tikinti məqsədləri üçün torpaq sahələrinin istifadəyə və ya icarəyə verilməsi;
– tikinti obyektlərinin tikintisinə və istismarına icazələrin verilməsi, məlumatlandırma icraatı məqsədləri üçün tikinti layihələrinin onların həyata keçiriləcəkləri müvafiq ərazinin planlaşdırılması tələblərinə uyğunluğunun müəyyən edilməsi, məlumatlandırma icraatının tətbiq edildiyi tikinti obyektinin inşasının başa çatması barədə müvafiq məlumatların Tikintilərin Dövlət Reyestrinə təqdim edilməsi, habelə icazələrin verilməsindən və uyğunluğun müəyyən edilməsindən irəli gələn digər səlahiyyətlərin həyata keçirilməsi;
– tikinti məqsədləri üçün ayrılması nəzərdə tutulan torpaq sahələrinin kateqoriyalara aid edilməsi və ya onların bir kateqoriyadan digərinə keçirilməsi ilə bağlı Nazirlər Kabineti qarşısında vəsatət qaldırılması.
Dövlət Şəhərsalma və Arxitektura Komitəsinə 1977-ci il təvəllüdlü Anar Quliyev sədrlik edir.
2020-ci ildə Azərbaycanın Ağdam, Füzuli, Cəbrayıl, Qubadlı, Zəngilan, Kəlbəcər rayonları, Laçın rayonunun böyük hissəsi, Şuşa şəhəri və rayonun bir hissəsi, Xocalı, Xocavənd rayonlarının, keçmiş Ağdərə rayonunun bir hissəsi erməni işğalından azad olunub.
