Dövlət Statistika Komitəsi iqtisadiyyatda işləyənlərin sayı və əməkhaqqı barədə hesabat yayıb. Rəsmi açıqlamaya görə, 2021-ci il fevralın 1-nə Azərbaycan iqtisadiyyatında muzdla çalışan işçilərin sayı 1 milyon 684,4 min nəfər olub, onların 915,3 min nəfəri dövlət sektorunda, 769,1 min nəfəri qeyri-dövlət sektorunda fəaliyyət göstərib.

2021-ci ilin yanvarında muzdla çalışan işçilərin orta aylıq nominal əməkhaqqının əvvəlki ilin eyni dövrünə nisbətən 3 faiz azalaraq 690,9 manata düşdüyü vurğulanır.

Novator.az bildirir ki, 2021-ci il yanvarın 1-nə orta maaş 707,3 manat idi.

2020-ci il yanvarın 1-nə 634,8 manatlıq orta maaş qeydə alınmışdı. Fevralın 1-nə orta maaş 712,1 manat, martın 1-nə 712,3 manat, aprelin 1-nə 744,5 manat, mayın 1-nə 736,2 manat, iyunun 1-nə 728,9 manat, iyulun 1-nə 720 manat, avqustun 1-nə 715,4 manat, sentyabrın 1-nə 710,2 manat, oktyabrın 1-nə 706,6 manat, noyabrın 1-nə 704,5 manat, dekabrın 1-nə 703,5 manat göstərilmişdi.

Azərbaycanda əmək pensiyasının sığorta hissəsi orta aylıq nominal əməkhaqqının illik artım tempinə uyğun indeksləşdirilir.

Pensiyanın sığorta hissəsi fərdi hesabın sığorta hissəsində qeydə alınmış pensiya kapitalının gözlənən pensiya ödənişi müddətinin aylarının sayına (144 ay) nisbəti şəklində hesablanan məbləğdir.

İndeksləşdirmə Dövlət Statistika Komitəsindən Əmək və Əhalinin Sosial Müdafiəsi Nazirliyinə təqdim olunan rəsmi bilgi əsas götürülməklə həyata keçirilir.