Fəlakətə izahat
İqtisadçı Rövşən Ağayev ölkənin səhiyyə sisteminə məsul orqanların 2020-ci ildəki demoqrafik vəziyyətlə bağlı hesabat hazırlayıb təqdim etməsini vacib sayır.
Novator.az bildirir ki, rəsmi statistikaya görə, 2020-ci ildə Azərbaycanda 75647 ölüm qeydə alınıb. Bu, 2019-cu illə müqayisədə 35,7% çoxdur. 2019-cu illə müqayisədə əhalinin təbii artımı (doğulanlar və ölənlərin nisbəti) üzrə 41,4 faiz geriləmə olub.
Rövşən Ağayev 1995-ci ildən ötən illərin 11-də ölüm sayının əvvəlki ilə nisbətən azaldığını, 14-də artdığını vurğulayır: “Lakin bu artımların ən yüksək səviyyəsi heç vaxt 5 faizi ötməmişdi. 2003-cü ildə belə göstərici qeydə alınıb. Yerdə qalan illərdə artım dinamikası maksimum 2-2,5 faiz intervalında dəyişib. 2020-ci ildəki 35,7 faizlik artım son dərəcə kəskin artımdır, hətta demoqrafik fəlakət sayıla biləcək durumdur və rəsmi izah tələb edir.
Bir məqamı da deyim: son üç-dörd ildə 65 yaşdan aşağı yaşda vəfat edənlər 40-41 faiz aralığında dəyişsə də, 2020-ci ildə 42,6 faizə yüksəlib. Bu isə cavan ölüm əmsalının daha da yüksəldiyini göstərir”.
1995-ci ildə ölkədə 50828 ölüm qeydə alınıb. 1996-cı ildə 48242 ölüm, 1997-ci ildə 46962 ölüm, 1998-ci ildə 46299 ölüm, 1999-cu ildə 46295 ölüm olub.
2000-ci ildə 46701 nəfər, 2001-ci ildə 45284 nəfər, 2002-ci ildə 46522 nəfər, 2003-cü ildə 49001 nəfər, 2004-cü ildə 49568 nəfər, 2005-ci ildə 51962 nəfər dünyasını dəyişib.
Sonrakı illərin rəsmi statistikası belədir:
2006-cı il – 52248 ölüm
2007-ci il – 53655
2008-ci il – 52710
2009-cu il – 52514
2010-cu il – 53580
2011-ci il – 53762
2012-ci il – 55017
2013-cü il – 54383
2014-cü il – 55648
2015-ci il – 54697
2016-cı il – 56648
2017-ci il – 57109
2018-ci il – 57250
2019-cu il – 55916.
