Mübariz Mənsimov həbsdən çıxdı
Azərbaycanlı iş adamı, “Palmali” Şirkətlər Qrupunun rəhbəri Mübariz Mənsimov 5 il şərti həbs cəzası ilə azadlığa buraxılıb. Hökm martın 5-i Türkiyənin İstanbul şəhərində keçirilən məhkəmə prosesində verilib.
Mübariz Mənsimov 2020-ci il martın 15-dən həbsdə idi. O, ABŞ-da yaşayan islamçı alim Fətullah Gülənə bağlı çevrə, Türkiyədə FETÖ adı verilmiş terror təşkilatı ilə əlaqələrdə təqsirli bilinir.
1968-ci il təvəllüdlü Mübariz Mənsimov gəmi ilə yük daşıyan “Palmali” Şirkətlər Qrupunu 1990-cı illərin sonunda Türkiyədə yaradıb. Şirkətin bir çox ölkədə ofisi var.
Mübariz Mənsimov xeyriyyəçilik fəaliyyəti ilə tanınır.
2016-cı il iyulun 15-də bir qrup hərbçi Türkiyədə hakimiyyəti ələ almaq təşəbbüsü göstərib. Yüzlərlə adamın həlak olduğu qiyam yatırılıb. Hakimiyyət çevriliş cəhdinin Fətullah Gülənin planı olduğunu iddia edib. Bu iş üzrə minlərlə şəxs həbs olunub.
