Dünyanın 130 ölkəsində hələ də vaksinasiya başlanmayıb
Dünyanın 130 ölkəsində hələ də koronavirus infeksiyasına qarşı vaksinasiya prosesi başlanmayıb. Novator.az-ın məlumatına görə, bunu Dünya Səhiyyə Təşkilatı və UNİCEF açıqlayıb.
Açıqlamada deyilir ki, dünyada indiyədək adamlara 130 milyon dozaya yaxın koronavirus peyvəndi vurulub. Amma peyvənd olunanların böyük əksəriyyəti inkişaf etmiş ölkələrdə yaşayır. 130 milyon dozanın dörddə üçündən də çox hissəsi cəmisi 10 ölkənin sakinlərinə vurulub. Bunlar elə ölkələrdir ki, dünyadakı ümumdaxili məhsulun 60 faizi onların payına düşür.
Koronavirusa qarşı vaksinasiyanın başlanmadığı 130 ölkədə isə 2 milyard 500 milyon adam yaşayır. Dünya Səhiyyə Təşkilatı və UNİCEF xəbərdarlıq edir ki, vaksinasiyanın aparılmaması həm milyonlarla insanın həyatını təhlükə altında qoyur, həm virusun yeni mutasiyalara uğramasına şərait yaradır, həm də dünya iqtisadiyyatını geri salır.
Vaksinləri bütün ölkələr arasında ədalətlə bölüşdürməyə çağıran, hökumətləri öz sərhədlərindən kənara baxmağa, pandemiyaya son qoya biləsi bir strategiya yürütməyə dəvət edən Dünya Səhiyyə Təşkilatı və UNİCEF bəyan edir ki, dünyadakı peyvəndlənmə prosesində çox böyük və çox təhlükəli bərabərsizlik hökm sürür.
2019-cu ilin dekabr ayında Çində üzə çıxan koronavirus infeksiyasına indiyədək dünyada 110 milyona yaxın adam yoluxub, onlardan 2 milyon 400 min nəfərdən çoxu vəfat edib.
