Abşeron ziyarəti, Yasamalda yeni park
Prezident İlham Əliyev və birinci xanım Mehriban Əliyeva fevralın 1-də Abşeron Rayon Mərkəzi Xəstəxanasının yeni binasının açılışında iştirak ediblər. AZƏRTAC-ın arayışına görə, 150 çarpayılıq tibb müəssisəsində cərrahiyyə, terapiya, pediatriya, reanimasiya, dializ şöbələri və digər şöbələr, həmçinin laboratoriyalar fəaliyyət göstərəcək.
Rəsmi xəbərə əsasən, İlham Əliyev və Mehriban Əliyeva Abşeron rayonunun Xırdalan şəhərində 3 saylı məktəb-liseyə də baş çəkiblər. Təhsil müəssisəsinin 1176 şagird yerlik korpusu əsaslı təmir olunub və 1200 şagird yerlik yeni əlavə korpus tikilib.
İlham Əliyev yenidən qurulan 220/110/10 kilovoltluq və yeni tikilən 110/35/10 kilovoltluq “Xırdalan” yarımstansiyalarının açılışına da qatılıb.
Daha sonra prezident və birinci xanım paytaxtın Yasamal rayonunda yeni salınan meşə tipli parkın açılışında iştirak ediblər.
