Yanvarın 20-də Cozef Bayden paytaxt Vaşinqtonda təşkil edilən inauqurasiya mərasimində and içərək ABŞ prezidenti kimi səlahiyyətlərinin icrasına başlayıb.

Cozef Bayden ABŞ-ın 46-cı prezidentidir.

Əvvəlki prezident Donald Tramp mərasimə qatılmayıb.

İnauqurasiya mərasimində Kamala Harris də and içərək ölkənin vitse-prezidenti kimi fəaliyyətə başlayıb. Kamala Harris ABŞ tarixində bu postu tutan ilk qadın, həm də ilk qaradərilidir.

1942-ci il təvəllüdlü Cozef Bayden Delaver Universitetini tarixçi və politoloq ixtisasları ilə bitirib, həmçinin Sirakus Universitetinin Hüquq Məktəbində təhsil alıb.

1972, 1978, 1984, 1990, 1996, 2002 və 2008-ci illərdə ABŞ Konqresinin yuxarı palatası olan Senatın üzvü seçilib. 1987-1995-ci illərdə Senatın Məhkəmə Komitəsinə, 2001-2003 və 2007-2009-cu illərdə Xarici Əlaqələr Komitəsinə sədrlik edib.

2009-2017-ci illərdə vitse-prezident postunu tutub.

Tarixi ənənəyə, 1951-ci ildən bəri isə həm də konstitusiya normasına görə, ABŞ-da eyni şəxs maksimum iki dəfə prezident olur. Yalnız Franklin Ruzvelt dövlət başçısı postuna iki dəfədən artıq (1932, 1936, 1940, 1944-cü illərdə) seçilib.

Novator.az bildirir ki, 1789-cu ildən bəri ABŞ prezidenti vəzifəsində bu şəxslər əyləşib:

Corc Vaşinqton: 1789-1797

Con Adams: 1797-1801

Tomas Cefferson: 1801-1809

Ceyms Medison: 1809-1817

Ceyms Monro: 1817-1825

Con Kuinsi Adams: 1825-1829

Endrü Cekson: 1829-1837

Martin Van Buren: 1837-1841

Uilyam Harrison: 1841

Con Tayler: 1841-1845

Ceyms Noks Polk: 1845-1849

Zakari Teylor: 1849-1850

Millard Fillmor: 1850-1853

Franklin Pirs: 1853-1857

Ceyms Bükenen: 1857-1861

Avraam Linkoln: 1861-1865

Endrü Conson: 1865-1869

Uliss Qrant: 1869-1877

Raterford Heys: 1877-1881

Ceyms Harfild: 1881

Çester Artur: 1881-1885

Qrover Klivlend: 1885-1889 və 1893-1897

Bencamin Harrison: 1889-1893

Uilyam Mak-Kinli: 1897-1901

Teodor Ruzvelt: 1901-1909

Uilyam Taft: 1909-1913

Vudro Vilson: 1913-1921

Uorren Hardinq: 1921-1923

Kalvin Kulic: 1923-1929

Herbert Huver: 1929-1933

Franklin Ruzvelt: 1933-1945

Harri Trumen: 1945-1953

Duayt Eyzenhauer: 1953-1961

Con Kennedi: 1961-1963

Lindon Conson: 1963-1969

Riçard Nikson: 1969-1974

Cerald Ford: 1974-1977

Cimmi Karter: 1977-1981

Ronald Reyqan: 1981-1989

Corc Buş (ata): 1989-1993

Bill Klinton: 1993-2001

Corc Buş (oğul): 2001-2009

Barak Obama: 2009-2017

Donald Tramp: 2017-2021.

Dövlət və hökumət başçısı olan ABŞ prezidenti həmçinin Silahlı Qüvvələrin ali baş komandanıdır.

ABŞ-da hökumətə Dövlət Departamenti (Xarici İşlər Nazirliyi) və digər nazirliklər daxildir.

Nazirliklərə rəhbərlik edən şəxslər katib adlanır. Xarici işlər nazirinin – Dövlət Departamentinin rəhbərinin vəzifəsinin adı dövlət katibi gedir. Ədliyyə Nazirliyinə rəhbərlik edən şəxs isə baş prokuror sayılır.

Nazirləri prezident Senatın razılığı ilə təyin edir.

Vitse-prezident, Ağ ev administrasiyasının başçısı, bir neçə federal qurumun rəhbəri və ABŞ-ın BMT-dəki daimi nümayəndəsi də kabinet üzvü sayılır.

Prezidentin qanunları imzalamaq, onlara veto qoymaq, hakimləri təyin etmək səlahiyyətləri var.

Diplomatik korpusun rəhbərləri və Ali Məhkəmənin hakimlərinin təyinatı üçün Senatın razılığı gərəkdir.