İsrailin “Haaretz” qəzeti ABŞ-da Konqres binasına hücumu Rusiya prezidenti Vladimir Putinin rəhbərlik etdiyi dezinformasiya kampaniyasının “möhtəşəm qələbəsi” kimi qiymətləndirir.

Ötən il noyabrın 3-də ABŞ-da prezident seçkisi keçirilib. Ümumxalq səsverməsində Demokratlar Partiyasının namizədi Cozef Bayden 538 nəfərlik Seçicilər Kollegiyasına 306, Respublikaçılar Partiyasının namizədi Donald Tramp isə 232 nümayəndə qazanıb.

Dekabrın 14-də Seçicilər Kollegiyasında səsvermə də 306:232 səs nisbəti ilə Cozef Baydenin xeyrinə yekunlaşıb.

2021-ci il yanvarın 6-da Konqres səsvermənin yekununu təsdiqləməyə topalşıb. Lakin Donald Trampın bir qrup tərəfdarı Konqres binasına hücum çəkib. Onlar binanı ələ keçirərək səsvermə prosesini pozublar. İğtişaşlar zamanı bir neçə nəfər həlak olub, 50-dən çox adam həbs edilib.

Konqres seçkinin nəticəsini yalnız yanvarın 7-də təsdiqləyə bilib.

4 ildir ABŞ prezidenti postunu tutan və bu il yanvarın 20-də hakimiyyəti Cozef Baydenə təhvil verməli olan Donald Tramp ölkənin bir çox ştatında seçkinin nəticələrinin saxtalaşdırıldığını iddia edir. Eyni təbliğatı onun tərəfdarları da aparır.

Novator.az-ın məlumatına görə, “Haaretz” qəzeti yazır ki, əslində Trampın və onun tərəfdarlarının təbliğatı Rusiyanın apardığı geniş təbliğat kampaniyasının bir hissəsidir.

Harvard Universitetinin hüquq fakültəsinin professoru Yonxay Benkler “Haaretz”ə açıqlamasında deyib ki, Rusiya təbliğatının əsas məqsədi insanları həqiqətin mövcud olmadığına, dünyada hər şeyin mümkünlüyünə inandırmaqdır: “Bu təbliğatın istədiyi odur ki, biz daha  heç kimə etibar etməyək”.

Dezinformasiya cəhdlərini araşdıran “Rand” şirkətindən də qəzetə bildiriblər ki, Rusiyanın təbliğat kampaniyasının məqsədi ABŞ-da demokratıya institutlarını zəiflətmək, amerikalıların demokratik institutlara, demokratik dəyərlərə etibarını sarsıtmaqdır. Şirkətin gəldiyi qənaətə görə, Rusiya bu məqsədə nail olmaq üçün Trampdan sadəcə bir vasitə kimi yararlanıb.

“Haaretz” yazır ki, biz dezinformasiyanı sosial medianın yaratdığı problem, yeni bir problem kimi qəbul etməyə meylliyik. Amma Yonxay Benkler qəzetə deyib ki, Rusiyanın təbliğat kampaniyasında əsas rolu kütləvi informasiya vasitələri oynayıb, sosial şəbəkələr bu sırada ikinci yerdə durub.

Mənbə: Haaretz.com