Koronavirus statistikası
2021-ci ilin ilk 10 günü ərzində Azərbaycanda koronavirus infeksiyasına 5350 yoluxma, xəstəlikdən 249 ölüm rəsmiləşib.
Novator.az bildirir ki, yanvarın 10-da yayılan milli hesabatda yoluxanların ümumi sayı 224050 nəfər, xəstəlik qurbanlarının ümumi sayı 2890 nəfər göstərilib.
2019-cu ilin dekabrında Çində üzə çıxaraq 220 ölkə, ərazi və məkanı bürüyən koronavirus infeksiyasına Azərbaycanda ilk yoluxma 2020-ci il fevralın 28-də, xəstəlikdən ilk ölüm martın 12-də qeydə alınıb, həmin il 218700 nəfər yoluxub, 2641 xəstə həyatını itirib.
İnfeksiyanı cilovlamaq üçün 2020-ci il martın 31-dən xüsusi karantin rejimi hökm sürür. Sərhədlər qapadılıb, dəfn mərasimləri istisna olmaqla yas mərasimləri, kütləvi tədbirlər, ad günləri, toy, nişan və bu kimi mərasimlər yasaqlanıb, başqa qadağalar qoyulub.
2020-ci il dekabrın 14-dən ölkə üzrə bir çox sahədə iş və xidmətlər dayandırılıb. Bakı, Sumqayıt, Gəncə, Mingəçevir, Şirvan şəhərlərinə və bir çox rayona giriş-çıxış bağlanıb. Həmin ərazilərdə hərəkət məhdudiyyəti tətbiq edilib. Evdən çıxmaq üçün SMS icazə sistemindən istifadə etmək və ya Daxili İşlər Nazirliyinin 102 xidmətinə zəng vurmaq gərəkdir.
